Faizabad, Jylliew:
Katkum ki khubor la ong ba 11 ngut ki la khlad noh na ka jingbthei bom ba la leh da u riewkheiñduh hajan ka jaka sah u Myntri ka Afghanistan bad 30 ngut ki la mynsaw.
Ka tnat kam pohiing jong ka IEA ka la pynrem jur halor katei ka jingleh khawpud jong kitei ki seng lehnoh kiba don kti ha katei ka kam thombor, khlem da pyrkhat shuh ia ki mynsiem ba lui-lui. Kane ka la jia ha ka jaka sah jong u Lat ka Badakshan, u Nisar Ahmad Ahamadi hapoh ka nongbah Faizabad ha ka Sngi Palei.
Watla katta, la ong ba ka jinglong- jingman hapoh Afghanistan ka la kham shngaiñ shibun naduh ba ka Taliban ka la ioh ban bat hi ia ka bor synshar ha katei ka ri naduh u Nailar jong u snem 2021. Ha kaba ka sorkar Afghanistan kaba la ioh jingkyrshan ruh na ka Sorkar US ka la duh noh ia ka bor synshar naduh katei ka por. Hynrei la ong ba ki kam thombor jong ka Islamic State (IS) ki dang iai jia hi na ka por sha ka por wat haba la hap hapoh ka kti jingsynshar jong ka Afghanistan.
Haba iadei bad kane, la ong ba ka kynhun lehnoh Islamic State ka la shim jingkit khlieh ba dei ma ka, kaba la leh ia katei ka kam thombor ha katei ka Sngi Palei, ha kaba utei u dkhot ka IS u la leit ban tynrah da ka kali kaba la thep pyndap da ki tiar pynbthei bad u la leit beit- beit ban tur sha ka jaka ba don ka kali jong utei u Lat ha ka ba u nongñiah kali jong utei u Lat u la khlad noh syndon bad 6 ngut kiwei pat kiba ia don lang ha katei ka jaka ki la mynsaw jur.
Katei ka jingbthei ha ka Sngi Palei, ka long ruh hakhmat ka jaka mane Muslim Nabawi kaba don hapoh Faizabad ha kaba ki don shibun bah ki riew ngeit Muslim kiba ialum lang ha katei ka jaka.
