Dibrugarh, Jylliew:
Ki bor pulit jong ka jylla Assam ha ka 10 tarik mynta u bnai ki la pyntip ba kawei ka longkmie na ka thaiñ Tinsukia kaba dang don hapdeng ka jingarmet kaba la shah thombor ha la u jong u kthaw ka la khlad noh hapdeng ki jingshah sumar ha Assam Medical College and Hospital (AMCH).
Kat kum ki jingïoh lum khubor la ïathuh ba katei ka longkmie kaba la tip kyrteng kum ka Sangeeta Sah ka la shah thombor ha la u jong u kthaw hadien ka jingmih jong ki jingïakajia kiba ïadei bad ki kam ïing kam sem.
Katei ka jingjia shah thombor jong katei ka longkmie ka la jia ha ka 4 tarik mynta u bnai bad u kthaw jong ka u dei u ba la tip kyrteng kum u Harinder Prasad. Hadien katei ka jingjia la ïathuh ba ïa ka Sangeeta la leit ban pynkit mar mar noh sha Tinsukia Civil Hospital bad hadien la leit ban pynkynriah noh sa sha AMCH.
Na ka jingshah thombor la ïathuh ba i khyllung iba katei ka longkmie ka dang pun ruh i la khlad noh hadien ka jingshah sumar kaba la neh kumba 5 sngi.
Halor katei ka jingjia la ïathuh ba na ka liang u kthaw jong katei ka longkmie u la leit ban aiti ïalade sha ki bor pulit ka thaiñ Tinsukia bad na ka liang ki bor pulit ki la set phatok noh ïa u na ka bynta ban pynlong ïa ki jingtohkit kiba dang sah.
