Sudan, Jylliew:
Ka Saudi Arabia ha ka Sngi Saitjaiñ ka la pynbna ba ki arliang shipai ka Sudan ki la mynjur ban sangeh iasiat shuwa hapoh jong ki 24 kynta ki ban wan.
Ka tnat kam bar ri jong ka Saudi Arabia ha katei ka sngi ka la iathuh ba kitei ki arliang shipai ki la kular ban sangeh iasiat ha katei ka por ba la buh kum shi bynta ban pyniaid shakhmat ia ki kam bad jingthmu ba la buh hakhmat.
Kumjuh ruh la ong ba ka Saudi Arabia bad ka United States ki la ialeh katba lah ban noh synñiang da ki tiar sumar sha Sudan naduh u Iaiong ba dang sdang khie ka thma hapdeng jong kitei ki 2 kynhun.
Kumta, ka tnat kam bar ri jong ka Riyadh ruh ka la maham ba lada katei ka jingsangeh iasiat kan pulom noh, kamut kan ym don jingiasuk hapdeng jong kitei ki arliang namar ka jingbym ia ailad markylliang ban plie lad noh ia ka jingïakren ïasuk hapdeng jong ki.
Ka UN ka la buh jingkheiñ antad ruh ba ki don kumba 1.5 Million ngut kiba la phet sakma na ki jaka sah jong ki naduh ba sdang ka jingïakynad hapdeng kitei ki ar kynhun bad bun na kitei ki paidbah ki la buhai shnong noh sha ki ri ba marjan.
