Washington, Nailur:
Ka kynhun dawa pisa online kaba la tip kum ka “ShinyHunters” ha ka taiew ba la dep ka la pyntip ba ka la ioh rung tuh hapoh ka website jong ka tnat tohkit jong ka sorkar pdeng bad ka la ioh tuh ïa shibun tylli ki jingtip bad jingdonkam jong ki dkhot bad ki heh ka FBI kiba mynta bad kiba mynshuwa ruh kumjuh.
Ka FBI ka la ong ba ka tnat ka tip ïa ki jingkynnoh ha kaba iadei bad ki kam khlem jingbit kiba ktah ïa ka FBIjobs.gov bad mynta ka dang tohkit.
Ha ka kyrwoh ba la pynmih ha ka ‘dark-website’ jongka bad ha ka jingïakren online bad ka Reuters, ka ShinyHunters ka la ong ba ka la thombor ïa ka FBI kum ka jubab halor ka jingpynbna jong katei ka tnat ha u Jymmang 2026 kaba la batai bniah ïa ki rukom treikam jong ka ShinyHunters bad ai jingmut ïa kiwei pat ki tnat lane ki nongshah thombor ba kim dei ban siew ïa ka pisa ba katei ka kynhun ka dawa.
Kumta, katei ka kynhun dawa pisa, ka la pyntip ba ka la ioh ban tuh ïa jan baroh ki jingtip jong ki briew lane ki Agent jong ka FBI bad kumjuh ruh jong ki riew shimet kiba la buh aplikeshon hapoh ka FBI na ka bynta ban shah thung kam.
Kum ka jingpynshisha, ka kynhun ka la tyrwa ïa kaei kaba ka la ong ba ka dei ka dur jong ka jaka trei jong ka FBI kaba la shah pynjulor bad kaei kaba ka kynhun ka la ong ba ka dei ka jingtip shaphang kumba 5,000 ngut ki agent kiba ka la ong ba ka dei ka nuksa jong ka jingtip ba la ioh tuh baroh.
Namar la ong ba ki ju don bun tylli ki kynhun dawa pisa, kiba ju phrung tuh ialade ban ioh rung ha ki website jong ki tnat bapher, hynrei ka FBI kam pat ju ngat ha kum kitei ki kam thok kam shukor namar ba ki lad jingiada jongka ki long kiba biang bad kiba skhem. Hynrei ha kane ka sien, ka long kaba phylla ban iohsngew ba katei ka kynhun dawa pisa ka la lah syndon wat ban rung tuh ha ka website jong katei ka tnat kaba khlaiñ bad ba skhem bad kaba ym pat ju don hi ruh kiba nud ban iatyngkhuh badka.
