Washington, Nailur:
Ha kawei na ki jingiakhun ba heh tam shabar ri, ka Essar Group jong ka India ka thmu ban bei tyngka $18 billion ha America, kynthup ïa ka karkhana shna nar ‘steel’ kaba $15 Billion ha Iowa. U President jong ka US, U Donald Trump, ula pynbna ïa kane ka projek Iowa, ha ka jingïalang jong ka Oval Office, ha ka jingïadonlang ki dkhot jong ka longïing Ruia, kaba long trai ïa kane ka conglomerate.
Ka tnat treikam jong ka Essar, ka Mesabi Metallics, kaba na US, kan pynroi ïa katei ka jaka, kaba la khmih lynti, ba kan long shi bynta jong ka jingpynpoi nar kaba la pyniasoh lang ha ka ri America, ha kaba u mawshun, un wan na ki kam jong ka kompeni ha Minnesota. U Trump, u la ong ba kan dei ka “karkhana shna nar kaba heh tam ha ka histori jong ka America”, da kaba buh ïa ka kum ka jingjop ha ka ioh ka kot ha ka jylla ba kongsan ha kaba ki Republican ki iakynduh ïa ki jingiakhun hapdeng ka samoi.
“Mynta ka sngi ngi dap da ka jingkmen ban pynbna ba ka Mesabi Metallics kan tei ïa ka karkhana shna nar kaba heh tam ha ka histori jong ka America ha ka jylla bah Iowa. Ka dei ka karkhana kaba heh tam, kawei na ki karkhana kaba heh tam ha ka pyrthei, hynrei ka dei ka karkhana kaba heh tam ha America haduh mynta,” la ong u president jong ka US ha ki nongthoh khubor.
Katei ka karkhana, kaba la thmu ban sdang pynmih ha u snem 2030, la khmih lynti ba kan pynmih 10 million ton ka nar ha ka shisnem, ynda la dep shna pura. Ka White House ka la pynpaw ba baroh kawei ka jingpynmih nar kan long ha America.
U Trump, u ong ba ka karkhana shna nar jong ka America, ka “kiew biang sha ka jingim”, da kaba ai burom ïa ka, namar ka jingpynkiew dor kaba 50% halor ka jingwanrah nar, kaba u la pynjari ha u snem ba la dep. “Baroh ki shna ïa ki karkhana jong ki hangne namar ba kim kwah ban siew khajna”, la ong u Trump. “Ka long shisha kaba eh.”
