Washington, Jylliew:
Kawei ka khynnah 17 snem na Storm Lake jong ka Iowa, ka la shah kem noh hadien ka jingdon kti ban ai wai ia ka kam pyniap ha uwei u briew, da kaba thmu ban shim ia ka jingim jong i khynnah 7 snem.
Ki pulit ki iathuh ba katei ka khynnah ka pyndonkam ia ka website RentAHitman.com khlem da pyrkhat ba katei ka website kan long pynban ka jingriam ia ka namar tang mar ia ioh ia ka jingbthah jong ka lyngba jong katei ka website, ki briew jong katei ka website ki la pyntip sha ki pulit ka Storm Lake ba don kiba thmu ban shim ia ka jingim itei i khynnah 7 snem ha katei ka thaiñ.
Ha kaba katei ka khynnah, hapoh jong katei ka website, ka la pyndap ia baroh ki jingtip naduh ka kyrteng, jaka sah bad kiwei kiwei ki jingtip kiba bniah ia kiba yn lah ban shem ia itei i khynnah 7 snem. Hadien ba ki pulit ki tip shaphang katei ka jingthmu jongka, uwei na ki heh pulit u la leit ban riam kum uta u ‘Hitman’ bad u la iakren bad katei ka khynnah ha ka 2 tarik u Jylliew, ha kaba katei ka khynnah ka la phah ia u ban pyniap ia itei i khynnah 7 snem da kaba iakut ruh ban siew da ka dor.
Hynrei la ong ba ym shym don kiba ap jingma na ka iing jong itei i khynnah 7 snem, la ka long ia ka kmie- u kpa ne kiba ia sah lang ha iing bad itei i khynnah namar ki pulit ki la ioh ban tehlakam noh ia katei ka jingthmu kam sniew jong katei ka khynnah ha ka por kaba biang.
Ia katei ka khynnah ym shym la pynpaw kyrteng namar ka dang dei kaba hapoh 18 snem ka rta bad kumta la pynshong noh ia ka ha ki jaka ri khynnah bad ba yn ai jinghikai ia ka ban pynbeit ia ka rukom pyrkhat bad ka jingmut sniew jongka. Ia katei ka khynnah la pynshong noh ha ka Cherokee YES Center bad la aiti ia katei ka kam ha ka ïingbishar ki khynnah katba ka jingtohkit ki pulit ruh ka dang iaid sha khmat.
Katei ka website ‘Rent-a-Hitman’ ka long tang ka website kaba shu pyniaid kai, ha kaba kitei ki bor pyniaid jong katei ka website ki la ioh ban pyntip sha ki pulit na ka por- sha ka por haba don kiba thmu shisha ban ai wai ha ki briew jong katei ka website ban phah pyniap ia kino- kino kiba ki shun ne don daw.
