Israel, Jylliew:
Ha ka sien ba nyngkong eh la ong ba ka Israel ha kane ka kynti, ka la pyrshang ban pyntreikam ia ki kali kamai ki ban shu her nalor suiñ kum shi bynta ban tehlakam ia ka jingjur palat ka dheng kali ha ki bynta bapher bapher jong ka ri.
Ia katei ka kam, la peit bad pyniaid da ka tnat Israel National Drone Initiative (INDI), da kaba pyndonkam ia kitei ki kali kiba la pynwan dur ha ki rukom jong ka drone kumba ju long hi ki drone kiba ju rah bad pynkit tiar na kawei ka jaka sha kawei pat.
Ha kane ka projek la iatrei lang da ka tnat Transportation Ministry, ka Israel Innovation Authority, ka Ayalon Highways Limited bad ka Civil Aviation Authority of Israel (CAAI) ha kaba la ailad ban pyntreikam ia katei ka projek hapoh ka ri jong ki Jiw.
La ong ruh ba kane ka long ka sien ba nyngkong eh ba yn pyntreikam ia kitei ki kali ba shu her ia kiba la ju tip kum ki drone, kiba ju pyndonkam tang ha ka ban kit ia ki tiar, hynrei ha kane ka por pat la thmu ban pyntreikam ha ka ban kit ia ki briew bad ki pasenjar kumba long ki kali kamai ba ju kit ia ki nongleit- nongwan na kawei ka jaka sha kawei ka jaka katkum ka jingdonkam jongki.
Ha katei ka jingpyrshang, ki don kumba 11 tylli ki kompeni kiba pynmih bad ki tnat ba dei khmih ia ki drone, kiba la leit ban sakhi bad ban peit thuh ia ka jinglong jingman jong katei ka jingpyrshang ia kaba ka Israel ka la leh ha kane ka taiew ba la lah. Kane ka long ka jingpyrshang kaba 2, hadien ka jingsdang ba nyngkong ha u Kyllalyngkot, ha kaba ka jingbei tyngka na bynta katei ka projek ruh ka la lut haduh palat $60 Million ban shna ia kitei ki drone kiba heh bad kiba long ban shong briew hapoh.
Kawei napdeng kitei ki drone kiba la pyrshang pynher ha ka taiew ba la leit ka dei ka ‘AIR ZERO’, ba la shna hi da ka kompeni na Israel, kaba lah ban kit ia ki tiar kiba khia bad kumjuh ia ki pasenjar, kumba ju long ki kali kit briew namar la ong ba katei ka jait drone ka lah ban kit kumba 220 kilo ka jingkhia ha ka jing jngai kaba 160 kilometre. Kiwei pat ki drone kiba la pyrshang ban pynher bad peit thuh ha katei ka jingpyrshang ki kynthup ia ka Dronery, Cando Drones bad ka Down Wind.
Kitei ki kompeni kiba kwah ban ïashim bynta ha katei ka jingpyrshang, kin hap ban pyni bad pynher ia kitei ki drone jongki ha kylleng ka ri ha ka por kumba shi taiew man la u bnai.
