London, Jylliew:
Hadien san snem ba lah pyntyllun ia ka kam shakri kum u CEO jong ka klob ialehkai phutbol ka Aston Villa, ka khubor ka iathuh ba u Christian Purslow un hiar shuki noh na katei ka kyrdan kaba u lah shakri ha katei ka klob lah bun tylli ki snem.
Shuh shuh ruh ka khubor ka iathuh ba u Purlow u iaisah ha ka jingshadkmen jong ka klob hapoh ka jingiaid pyniaid u Unai Emery kum u manager jong ka kynhun kaba lah shah jied na ka bynta ka Europe hadien ba ka tei ka kynhun ka lah pyndep ia ka jingiaid lynti ha ka jak aba hynniew ia ka EPL.
Na ka liang jong utei u CEO u iathuh ruh ba ka kynhun baroh kawei ka lah sengbiang mynta ialade ha ka EPL ha kaba mynta ka don hapdeng jong ka jingiakhun ha ka jingdon ruh ka kynhun ialehkai jong ki kynthei bad ruh ka shlem ai jinghikai ialehkai na ka bynta ki khynnah shynrang bad kynthei bad kiwei kiwei ki bynta ha ka jingkyntiew mynta ia ka klob baroh kawei.
Kumba ka paw, katei ka klob ka don ha ka 2nd Tier jong ka lympung Championship ha ka por ba u Purslow u lah poi ha ka kynhun; kata tang khyndiat sngi hadien ba u trai jong ka klob u Wes Edens bad Nassef Sawiris ki lah shimti bad pyniaid ia ka kynhun baroh kawei kum ki khliehduh.
Wat hadien ba ka klob kan sa duh noh mynta ia u CEO jong ka, ka khubor ka iathuh ba katei ka klob kan pynkhreh ruh na ka bynta ban ialehkai ha ka Europa Conference League ha ka aiom ialehkai ka ban wan, kaba long ka jingiaid lynti ba nyngkongeh jong ka ha ka dewbah Europe naduh ka aiom ialehkai 2010-11.
