Peshawar, Jylliew:
Ki bor pyniaid ka Pakistan ha ka Sngi U Blei ki la iathuh ba kumba 27 ngut ki briew, kynthup ia 8 ngut ki khyllung rit na ka thaiñ Northwest jong ka Pakistan ki la khlad noh namar ki jinglynshop jong ki bor mariang naduh u slap bad lyer ba jur bha ha kine ki khyndiat sngi ba la leit.
Kumba 12 ngut napdeng jong kitei kiba khlad ki dei kiba la shah tap bad shah tep im ha ka jingtwa ki iing ki sem bad ki kynroh ha ki jingjia bapher kylleng jong katei ka thaiñ.
La ong ba saw tylli ki distrik jong ka Khyber Pakhtunkhwa ki la sakhi ia ka lyer kaba jur bha naduh ka janmiet jong ka Sngi Saitjaiñ, ha kaba 15 ngut ki la khlad ha ka distrik Bannu, kynthup ia ki 5 ngut ki shi para naduh ka rta ba 2 snem haduh 11 snem.
Palat 140 ngut ruh kiba la ngat bad mynsaw ha kitei ki sngi bad palat 200 tylli ki jingri kiba la shu iap ei.
Ki bor pyniaid ki la bthah ia ki la pynbna da ka jingmaham haba iadei bad ka jingwan lynshop jong ki bor ka mariang ha kitei ki 4 tylli ki distrik.
Ha u snem ba la leit, ka Pakistan ka la ioh mad ia u slap ba khlem sangeh baroh kawei ka aïom lyiur ha kaba, kumba shi pawa na ka ri Pakistan ka la dap bad shlei da ka um suda kat sha ba phai, ha kaba kumba 2 million tylli ki iing briew ki la julor bad palat 1,700 ngut ki la khlad ha utei u snem.
Ha kajuh ka por, ha ki bynta South pat jong katei ka ri, la ong ba ki bor pyniaid ha ka Sngi U Blei hi ki la pynbna ia ki lad jingpynkhreh lypa namar ka jingdon jong ki ‘erlangthari kiba lah ban wan poi na ki bynta ka Arabian Sea sha ka phang jong ka India bad Pakistan.
Kumjuh ruh na ki liang ka Disaster Management jong ka Sindh ki la maham lypa ba katei ka thaiñ ka lah ban ioh mad ia u slap uba jur ha ryngkat ka lyer kaba khlaiñ palat ia ka 100 kilometre ha ka shi kynta.
Namarkata ruh la bthah ia ki nongtong doh ba kin ym leit sha duriaw tad haduh ka 17 tarik jong une u Jylliew katba ka jinglong- jingman ha duriaw ka dang ap jingma kumba la iohi ha kine ki sngi.
