Kakamigahara, Jylliew:
Ka jinglah da ka kynhun ialehkai Hockey ki kynthei ka ri na ka bynta ban pynseisoh ia ka kam ialehkai jong ki ha ka lympung iakhun ba mynta ka Women’s Junior Asia Cup ka lah nang iai tyllun shakhmat bad shaduh ka lynti jong ka jingkhur jingjop biang ka jong ka, ha kaba katei ka kynhun da ka jingiatreilang da baroh ki nongialehkai ka la lah ban pynliem noh ia ka kynhun iakhun pyrshah kaba long ka lahduh saw sien ha ka lympung ka South Korea da 2-1 ha ka jingiakhun phainal ka jong ki.
Kumta ruh ka khubor ka iathuh ba katei ka jingjop ha kaba lah rah da katei ka kynhun ialehkai jong ka ri ka long ruh ka sien jop kaba lai ba ka la lah ban khur na ka lympung. Shuh shuh ruh katei ka kynhun ialehkai ka ri ka lah pyniaid ia ka jingiaid lynti ha ka lympung kum ka kynhun ba khlem shah pynrem wat tang shisien ruh bad ioh ruh ha ka ban khur ia ka jaka na ka bynta ka jingia aireng pat sa ha ka Women’s Junior World Cup 2023. Ha katei ka jingiaknieh rah ia ka trophy jingjop na katei ka lympung iakhun kaba mynta, ka khubor ka iathuh ba ka Annu bad Neelam ki lah pynsawa jam ia ka jingjop sha ka kynhhun ialehkai baroh kawei katba ka Park Seo Yeon ka long ka thei ialehkai jong ka kynhun iakhun pyrshah kaba la lah ban khyllie tang shi kol na ka bynta ban pynioh sha ka kynhun ialehkai ka jong ka. Hadien ka jingbym shym la lah da ki ar kynhun ban thep kol ha ka quarter ba nyngkong jong ka jingiakhun, ka kynhun ialehkai ka India ka lah iohlad ban rah ia ka bol shakhmat tad haduh ba kan da khur ia ka kol ba nyngkong ha ka 22 min ialehkai lyngba ka Annu kata na ka PC (penalty corner) ba ka lah ioh ban kamai.
Kumjuh ruh ka Korea ka lah shim por tang lai minit na ka bynta ban pynphai bad pyniakhaid kol kata ha ka 25min ialehkai lyngba ka Park Seo Yeon. Katba ka jingiakhun ka dang iai tyllun shakhmat ha ryngkat bad ki por ialehkai ba dangsah, ka India sa shisien ka lah ioh ban kamai kol biang kata ha ka 41 min lyngba ka Neelam kaba lah tied kaba tyngeh ia ka bol na ka bynta ba sha kyndong jong ka liang kamon jong ka nongapol ka kynhun iakhun pyrshah. Da katei ka jingjop, kum ka khusnam sha ki nongialehkai ka ri, na ka liang jong ka Hockey India (HI) ka pynbna ruh mynta ba kan sam sha man la ki thei ialehkai jong ka kynhun ialehkai ka ri ia ka song pisa kaba haduh T. 2 lak katba ki nongtrei bad ki nongiarap jong ka kynhun kin ioh mar T. 1 lak.
