Guwahati, Jylliew:
Ki bor sorkar jong ka jylla Assam ha ki khyndiat sngi ba la dep ki la pyntip ba ka National Investigation Agency (NIA) ka la ïoh ban kem ïa 4 ngut ki runar na ka daw jong ka jingdonkti jong ki ha ki kam beaiñ kiba ïadei bad ki kynhun lehnoh jihadi. Ïa kitei ki 4 ngut la ïoh ban kem na ka thaiñ Goalpara bad Bongaigaon district jong ka jylla Assam.
Ki bor sorkar ki la pyntip ba ïa ki 3 ngut ki runar la ïoh ban kem na ka thaiñ Goalpara, katba ïa uwei pat la ïoh ban kem na ka thaiñ Bongaigaon.
Kat kum ki jingïoh lum khubor la ïathuh ba na ka liang ka NIA ka la leit ban pynlong ïa ki jingkhynra kiba jur ha ka Sngi Thohdieng kaba la dep, bad ki la ïoh ban kem ïa kitei ki runar ha ka sngi kaba bud (Sngi Saitjaiñ).
Ki 3 ngut ki runar kiba la shah kem na ka thaiñ Goalpara ki kynthup ïa u Abdus Suwahan – nongshong shnong ka thaiñ Govindapur, u Jalauddin – nongshong shnong ka thaiñ Matia, bad u Abdus Suwahan – nongshong shnong ka thaiñ Tinkonia.
U runar u ba la shah kem na ka thaiñ Bongaigaon u die u ba la tip kyrteng kum u Hafizur Rahman – nongshong shnong ka thaiñ Kabaitari – ka thaiñ ba hap hapoh ka jingkhmih jong ki bor pulit ka Jogighopa PS.
Kat kum ka jingïathuh jong ki bor sorkar, ki la pyntip ba ïa u Hafizur Rahman – nonghikai jong ka Markazul Ma Arif Qariana Madrasa kaba don ha ka thaiñ Goalpara, u la shah kem ha ka 26 tarik u Nailar, 2022 na ka daw jong ka jingdonkti jong u bad ki kynhun lehnoh jihadi. Hadien katei ka jingshah kem, la ïathuh ba na ka liang ka sorkar Assam ka la leit ban pynpra nohruh ïa katei ka madrassa. Ïa u Rahman la phah sha ‘judicial custody’ bad hadien katto katne sngi u la ïoh jamin noh.
