Shillong, Jylliew 18:
Ka basa die doh masi ha Ïewduh naduh ba lap ïa ka jingpang at-sniehdoh ha ki masi ka la kynjah hi slam-slam bad ki paidbah nongthied doh ruh ki la duna bha haba ïanujor bad ki por kiba la leit.
Haba ïakren bad katto-katne ngut ki nongdie doh masi ha Ïewduh, ki la pynpaw ka jingbynñiaw namar ka jingtieng jong ki paidbah ban wan thied doh masi mar syn bna ïa ka jingpang at-sniehdoh ne ka ‘Lumpy Skin Disease’ (LSD) ha ki masi.
Ki la ïathuh ruh ba namarba ka ïew ka la hiar shaba palat, ki hap ban die tang 4-5 kilo ha ka shi sngi bad kumta kim banse ban khang noh ïa ki dukan ne shong die tang haduh shiteng sngi.
Ha kajuh ka por, ki la pynshai ba ka doh kaba ki die ha ïew kam don jingktah ïa ka koit ka khiah naba ki ot bad die beit tang ïa ki masi ki bym don jingpang.
U nonglum khubor ‘U Nongsaiñ Hima’ haba leit sha Ïewduh ha ka Sngi Saitjaiñ u la sakhi ba bun na ki dukan ha basa die doh masi ki la khang lut namar ka jinghiar palat ka ïew.
“Ka ïew te ka la hiar, ban die ruh ym lah die shuh, ki briew ki tieng. Hynrei da bam ym lei-lei namar ngi ot da u masi ba bha, ngim ot da u masi uba long kumto,” la ong uwei u nongdie doh masi.
Une u nongdie u la ong ruh ba ïa mynta, ka doh kaba u die ka long tang kumba 4-5 kilo eiei ha ka shi sngi.
“Lada ot uwei u masi bad die tang 4-5 kilo te shano yn bret ïa ka doh,” u la ong.
Ha kawei ka liang, haba kdew ba ki nongthied ki ïa bam ïa ka doh shaiñ bad doh snier,” u la ong, “Ïa ka doh-met pat ki sang…ki nongthied ruh ki la shu lehroh.”
Shuh shuh u la ban biang ba u masi uba ot bad die ha ïew u dei uba bha.
