Paris, Jylliew:
Ki pulit ka France ha ka Sngi Ba-ar, ki la pyniap ïa uwei u khynnah ba dang ha ki khat’ snem tang namar ba u phet na ka jaka talasi ïa ki kali ne ‘Traffic Check’ shabar jong ka Paris. Kane ka jingjia ka la pynkyndit ïa ki paidbah halor ka jingkloi jong ki bor pahara katei ka jaka ba kin pyndonkam da ka bor pyrshah ïa ki nong- pynkheiñ aiñ khlem da wad bniah ïa ka daw bad khlem da pyrkhat ruh ïa ka mynsiem briew ba kordor.
Utei u khynnah ba la shah siat iap u dei uba dang 17 snem ka rta bad u la leit poi sha katei ka jaka da ka kali kaba u shu pan wai na kiwei. Utei u khynnah u la leit poi da katei ka kali sha nantere jong ka phang West ha Paris ha ka Sngi Ba-ar ha kaba ki pulit ki la tan ïa u namar ka jingpynkheiñ ïa katto katne ki kyndon ñiah kali ki bym da shong nia eh.
Hynrei la ong ba namar utei u khynnah u lap ka jingshep tieng ba ka kali ba u ñiah ruh kam dei ka jong u, kumta u la ialeh ban kiar ïa ka jingshah tohkit bad u la pyrshang ban phet katba lah ban pyllait ialade na ka kti ki pulit ha katei ka por.
Katkum ka dur-khih (video) ba la saphriang paidbah ha Social Media, la iohi ïa 2 ngut ki heh pulit kiba pyrshang ban pynsangeh ïa katei ka kali, ha kaba uwei pat u pulit u la thew da ka suloi sha utei u nongñiah na ka jingkhang iit. Hadien kata la iohi ïa katei ka kali ba ka kylla noh tang hadien katto katne ka jing jngai. Mar kumta hi ki briew ki la leit iarap ban khyllie bad pynim ïa u hynrei utei u khynnah u la khlad noh hashen.
Ki bor pyniaid ki la bat noh ïa utei u pulit uba la shah pharep don kti ha ka jingsiat ïa utei u khynnah naka bynta ki jingtohkit kiba bniah.
Ha katei ka janmiet ki nongshong shnong ka Nanterre ki la mih ban ïakhih, ki la thang ruh ïa ki kali bad ka jaka ap bos ha katei ka thaiñ namar ka jingleh don bor jong kitei ki bor pahara ïa ki paidbah nongshong shnong.
