Jamaica, Jylliew:
Uwei u nong Britain uba dang leit kai shuti bad la ki bahaiing- hasem sha Jamaica u la khlad noh hadien ba u la dih jubor haduh 21 klat ki jait kyiad bapher bapher kat kiba don ha ka ‘Menu’ jong kawei ka jaka dih ha katei ka jaka. Kane ka la jia ha u Jymmang jong u snem 2022 hadien ba u Timothy Southern, 53 snem ka rta, u dang leit kai ban pynlut por bad la ka iing bad ki khun, ka hynmen bad kiwei de ki bahaiing- hasem jong u ha katei ka por.
Katkum ka kaiphod ba la ioh lum, la ong ba utei u briew u la khlad namar ka jingkylla bih jong kitei ki jingdih kiba u la dih khlem sangeh ha kajuh ka por shisien dih bad ka long ruh hadien ba u la dih ïa 12 jait ki kyiad kiba don ha katei ka jaka dih ‘Royal Dacameron Club Caribbean’ kaba don ha Saint Ann’s. Tang mar ïa dep dih ïa kitei ki jingdih, u la leit phai noh sha ka jaka sah ‘Hotel’ bad u la ioh kem pang naduh katei ka sngi.
Ki bahaiing- hasem jong u ki la pyrshang katba lah ban iarap ïa u bad ki la kynnoh ruh ïa ki tnat iarap ba dei ka jingpynslem jongki ba kim lah shuh ban iarap ïa u ha ka por kaba biang.
Uwei na kitei ki bahaiing, u la iathuh ba ha ka por ba utei u briew u kem pang, une uwei pat u la pyrshang ban phone bad khot ïa ka kali kit nongpang bad tang mar ïa kit hi hapoh ka kali kit nongpang, utei u briew u la prie bad khlem tip briew shuh. Watla u la pyrshang ban khot ïa ka kyrteng jong u, hynrei utei u briew um shym kren ne pynphai ktien shuh.
Ha kane ka por pat, la ong ba ki pulit ki la wad bniah halor ka daw ka jingiap jong u Mr.Southern ha u snem ba la leit, la shem ba ka daw baroh ka dei namar ka jingdih khleh ïa shibun jait ki jingdih pynbuaid. La ioh jingtip ruh ba ha katei ka sngi, u Mr.Southern u la mih dang step na iing ha kaba u la iakynduh ïa 2 ngut ki kynthei nong Canada kiba la khot sngewbha ïa u ban ïa leh kmen badki ha katei ka jaka dih bad dei ruh ha katei ka miet bad u Southern u la dih ïa 21 tylli ki jingdih ban pyndep ïa ka jingiakob pyni bor katba khlaiñ dih kyiad, kum shi bynta ruh na ka jingrakhe ïa ka sngikha jong kawei na kitei ki kynthei kiba iadon lang ha katei ka jaka ha katei ka por.
Hadien ka jingkhlad jong u ha Jamaica, ki bor pyniaid ka Jamaica ki la iarap ban pynpoi noh ïa ka met jong u sha ki bahaiing- hasem ha ka rukom kaba dei khlem da pynslem ruh ba kin ioh ban leh burom khatduh ha ka iingsah jong u.
