Taipei, Jylliew:
Ka tnat ïada ri jong ka Taiwan ha ka Sngi Balang ka la pyntip ba ha ka Sngi Ba-ar ka la lap bad iohi ïa 2 tylli ki jhad thma jong ka Russia ha ki bynta sha ka phang Mihngi jong ki duriaw jong ka. Kumta ka la phah ïa ki liengsuiñ thma ban leit syntiat sha katei ka jaka bad ban peit thuh ïa ka jinglong-jingman bad ka jingiaid lynti jong katei ka jhad.
Ha ka jingthoh ba la pyllait da ka tnat iada ri jong ka Taiwan, la ong ba 2 tylli ki jhad thma jong ka Russia ki la leit poi sha ka phang Mihngi jong ka duriaw hajan ka Taiwan hynrei kitei ki jhad ki la mih noh na katei ka bynta hadien ba la sngewthuh ïa ka jingmaham na ka Taiwan ha katei ka sngi.
Kumta la ong ba ka tnat iada jong ka Taiwan ka la phah ïa ki liengsuiñ bad ki jhad thma jongka ban leit peit thuh ïa ka jing-long-jingman jong katei ka bynta ha katei ka sngi bad ka la pynkhreh ruh ïa ki ‘Shore-based Missile Systems’ khlem da pynslem shuh namar ka jingma kaba khraw ïa katei ka ri dew lynnong lada jia ba ka Russia ka thmu ban leit thombor ïa ka hadien jong ka Ukraine.
Kumjuh ruh na ka liang ka Russia ha ka Sngi Ba-ar ka la pyntip ba ki jhad jong ka Russian Pacific Fleet ki la leit ban rung sha ki bynta South jong ka Philippine Sea naka bynta ki jingdonkam kiba ka hap ban iaid lyngba jong kitei ki bynta.
Ka Taiwan ka la iasnoh kti lang bad ka United States bad kumjuh ruh kiwei de ki ri kiba pyrshah jur halor ka jingleit hiar thma jong ka Russia pyrshah ïa ka Ukraine, ha kaba kitei ki ri baroh ki la pynngat kyndon bad pynkut noh ïa ka jingiadei kam bad ka Russia naduh ba sdang ka thma ha u snem ba la leit.
Kumta, la ong ba ka don ka jingma kaba ap ïa ka Taiwan lada ka Russia ka leit ban syntiat ha katei ka rukom namar kumba la tip ruh ba ka China ka la dep kam trai lypa ïa katei ka ri dew lynnong naduh ki 3 snem ba la leit bad ka Taiwan ruh ka la ju sakhi ïa ka jingleit rung bad jing kilan jong ki jhad thma bad liengsuiñ ka China ha kylleng sawdong jong ka Taiwan ha kine ki por ba la leit.
