Florida, Jylliew:
Ha kane ka khubor la ong ba utei u briew u la shah dait bad shah tan ha u dohkha ‘Shark’ na ka lieng kaba u shong ha ka Sngi Thohdieng jong ka taiew ba la lah bad kane ka la jia hapoh ka Everglades National Park jong ka nongbah Florida katba utei u briew u dang shaniah ha ka bynta ba narud jong ka lieng naka bynta ban sait ïa ki kti jong u.
Katkum ka video ba la saphriang paidbah, la iohi ïa utei u briew ha ka por ba u shah kynrup ha utei u dohkha bad uba la pyrshang ban tan jubor ïa utei u briew shapoh um hadien ba utei u dohkha u la ioh ban dait na ka kti jong u ha katei ka sngi. Hadien kata, utei u dohkha u la ioh ban tan ïa utei u briew shapoh um hynrei ka long kaba donbok ba ki para ba ialeit khwai lem bad u, ki la ioh ban tan bad sei biang noh ïa u na um shalor ka lieng.
Ia katei ka jingjia, la ioh ring dur da uwei na kitei ki shi kynhun uba la tip kyrteng u Michael, ha kaba u la iathuh ba katei ka long ka jingjia kaba shyrkhei tam kaba um pat ju ioh mad mynno- mynno ruh ha ka jingim jong u.
Kumta, u Michael u la ong ba ka long ka jingma kaba khraw lada ki briew kim tip ïa kaei kaba la jia ha katei ka sngi, namar kynsan- kynsan utei u dohkha u shu mih bad kynrup ïa ka kti jong utei u paralok khlem da iohi ïa ki dak ne jingmaham. Namarkata ruh u kyntu ïa ki paidbah ba kin long kiba phikir haba leit sha kum kitei ki jaka bad ba kin ialeh ban ym pyndei kti ha ka um khnang ba kin lait na kum katei ka jingjia.
Hadien katei ka jingjia, ïa utei u briew la pynkit noh da ka liengsuiñ sha Jackson South Medical Centre naka bynta ban ai jingsumar ïa u na ki jingmong kiba u la shah dait ha utei u dohkha.
Katkum ka kaiphod ba la buh jingkheiñ da ka International Shark Attack File jong ka University of Florida, la shem ba ki don haduh 57 tylli ki jingjia shah dait shark ha kylleng ka pyrthei hapoh jong u snem 2022 ba la leit.
