Bengaluru, Jylliew:
Hapdeng ka por jong ka jingïaleh ban pynurlong ïa ki jingkular, la paw ba ka seng Congress ka la trei shitom bad ïakhun dohim-dohïap na ka bynta ban lah pynurlong ïa ki jingkular ba la khlei ha ka por ilekshon.
Ka sorkar ka la ïaleh ban pynbiang ïa ki jingkular ha kaba ïadei bad ka jingsam khaw sha ki nongïoh myntoi, ha kaba wat lada kam lah ban pynbiang ïa u khaw, ka la rai ban sam da ka pisa. Ka jingbym lah ban pynïoh bun ïa u khaw na ki nongshalan ka la pynlong ïa ka sorkar ba kan ai da kane ka rai. Ha kaba ïadei bad kane ka la rai ban ai sha ki nongïoh myntoi da ka pisa kaba long ha ka dor T. 34 shi kilo u khaw, na ka bynta ka jingïarap shuh sa 5 kilo ki jingbam kum ki shana, symbai ne shyieng kumba la kular hapoh ka jingtreikam jong ka skhim ‘Anna Bhagya’.
Ka seng Congress, ha ka jingpyllait ïa ki mat treikam, ka la kular ban ai shuh shuh sa kumba 5 kilo u khaw ha ka shi bnai ha ryngkat san kilo ba la ai ei da ka sorkar kmie. U Myntri ka Food and Civil Supplies jong ka Karnataka u K H Muniyappa u la ong,
“Naduh ka tarik ba la pyllait ïa ka skhim Anna Bhagya ha ka 1 tarik, Naitung ngi la bat ïa ka jingkular, mynta ha ka kynhun ki Myntri, u Myntri Rangbah u Siddaramaiah, u Symbud Myntri Rangbah u D K Shivakumar bad kiwei pat ki Myntri ki la ïarai lang ba haduh mynta dang sam ïa u khaw, ngin sa ai da ka pisa kaba kot kat ka dor T. 34 shi kilo, uba dei ka dor jong ka FCI, sha kito kiba bat ïa ki Card BPL.”
Man iwei pa iwei kiba paw kyrteng ha katei ka Card kin sa ïoh mar T. 170 shi bnai na ka bynta u khaw uba 5 kilo hapoh ka jingtreikam jong ka skhim Anna Bhagya, la batai shai u Myntri. U Muniyappa u la ong ba ka sorkar mynta ka dang pynbeit ryntih na ka bynta ban phah ïa ka pisa sha ki Account jong ki nongïoh myntoi.
Ka sorkar ïa mynta ka hap ban pynurlong sa ïa ar tylli ki jingkular ba la khlei sha ki paidbah ha ka por ba la don ka ilekshon.
