Jeddah, Jylliew:
Ki heh ka US ki la pyntip ba uwei u nong-ap pahara u la kyllon iap noh ha ryngkat bad uwei u runar hapdeng ka jingiakhun ba markylliang hapoh ka nongbah Jeddah jong ka Saudi ha ka Sngi Balang.
Hynrei la ong ba kam shym don kano- kano ka jingma ia ki nong America kiba shong ha katei ka thaiñ hadien jong katei ka jingjia. Wat la katta, ki bor pyniaid jong katei ka thaiñ ki la pynjari da ka jingkhangdam tang mar ia ioh jingtip halor katei ka jingjia.
Kane ka la jia ha ka por kumba 6:45 PM hadien ba uwei u briew uba wan poi da ka kali, u la leit sangeh hakhmat ka ophis ‘Consulate’ bad u la sei ia kawei ka suloi na ka met jong u bad tang mar kumta hi kitei ki arliang ki la iasiat markylliang haduh ba kin da kyllon iap ha katei ka jaka, khlem da pynmynsaw pat ia kiwei kiba don ha katei ka jaka.
Utei u nong-ap pahara u dei u nong Nepal bad u la khlad noh hadien ka jingmynsaw na ka jingshah ksam kuli ha katei hi ka jingjia.
Ki bor pyniaid ki la phah ia ka jingsngewlem sha ka iing jong utei u nong-ap pahara uba la duh noh ia la ka jingim hapdeng ka jinglen lade jong u ban iakhun bad utei u runar ha katei ka miet.
