Peshawar, Jylliew:
Ka tnat pulit Khyber jong ka Pakistan ha ka Sngi Balang ka la pyntip ba don ka jingkynad kaba mih ha kawei ka iing iathoh shongkurim ha ka thaiñ Pakhtunkhwa bad 9 ngut ki la khlad ha katei ka jingjia.
Kane ka la jia hapoh Batkhela Tehsil jong ka distrik Malakand, ha kaba 9 ngut ki dkhot jong katei kajuh ka longiing, kiba kynthup ia 3 ngut ki longkmie bad 6 ngut ki rangbah, ki la shah siat iap ha ka por ba ki dang ioh thiah. Kitei ki runar kiba don kti ha katei ka kam thombor ki dei hi ki para marjan jong katei ka longiing, kiba la leit rung bad synreit kuli naphang kat kiba don ha katei ka iing hapdeng ka jingiap iohthiah lyngngai ha katei ka miet.
Kawei na ki daw ba ki pulit ki la ioh ksai halor katei ka jingjia, ka long namar ka jingbym iabeit lang haba iadei bad katei ka jingiathoh shongkurim kaba la pyndep ha katei ka sngi. Kumta ruh ki dang ialeh ban wad bniah bad ban tih bniah ia ki daw ba sha lyndet jong katei ka jingsynreit kuli kaba la jia ha katei ka miet.
La ong ba, tang mar ia ioh jingtip hi halor katei ka jingjia synreit kuli ha katei ka miet, ka kynhun ki bor pahara ka la leit mareh mar-mar sha katei ka jaka bad ban pynkynriah noh ia kitei ki metïap na katei ka iing sha ka jaka sumar ha Batkhela naka bynta ban pyndep ia ka Post-mortem.
La khang noh ruh ia baroh ki jaka rung- jaka mih jong katei ka distrik khnang ban pynsuk ha ka ban ioh kem ia kitei ki runar kiba don kti ha katei ka kam thombor.
U Muhammad Azam Khan u la bthah ia ki pulit ba kin pynkloi haba iadei bad ka jingwad bniah bad ban thwet ia kiba don kti baroh bad ban ioh kem noh ruh ha ka por kaba biang ha ryngkat ki kyndon pynshitom kiba iadei bad ka jingleh pynkheiñ aiñ jongki.
Ha kajuh ruh ka por, u Khan u la ong ba ia kitei ki runar yn pynshitom katkum ka aiñ bad kumjuh ruh yn pynïoh ia ka hok jong katei ka longiing ha ryngkat ki jingnoh synñiah sha ki bahaiing- hasem jong katei ka longiing.
