Mexico City, Jylliew:
Ka tnat ka koit ka khiah jong ka Mexico ha ka Sngi Palei ka la pyntip ba ki don palat 100 ngut ki briew kiba la khlad noh namar ka jingkylla ka suiñ bneng bad ka jingshit kyrang jong ka suiñ bneng hapoh ki ar taiew ba la leit. Kane ka jingshit ka suiñ bneng ka long palat ia ka 50 Degree Celsius (122 Fahrenheit) ha katto katne ki bynta jong ka ri.
La ong ba ka Mexico ka la ioh mad ia ka jingshit kyr-ang kumba lai taiew kynthih hapoh jong une u Jylliew bad kane ka la pynlong ia ki bor pyniaid jong katto katne ki bynta jong ka ri ba kin khang nong shwa ia ki skul bad ki jaka pule namar ka jingsheptieng ioh kin shah ktah bad ioh kem pang lut namar ka jingsniew jong ka suiñ bneng kaba ap jingma shibun eh ia ka koit- ka khiah jongki.
La iathuh ruh ba kumba 2 na ka 3 bynta napdeng kito kiba khlad ha u Jylliew, la shem ba ka jingioh kem pang ka dei namar ka jingpher ka suiñ bneng.
Bun hi na kitei kiba khlad ki dei namar ka jingjur palat ka jingshit ba ka met jongki kam lah shuh ban iakhun bad ban tehlakam ia ka jingshit bad jingkhluit. Kumba 64% na kiti kiba khlad ki dei na ki bynta North jong ka Nuevo Leon kaba don ha markhap bad ka nongbah Texas. Katba kitei kiwei pat kiba khlad ki dei na ki thaiñ ba marjan jong ka Tamaulipas bad ka Veracruz ha ki bynta ka Gulf Coast.
Ha kine ki khyndiat sngi ba la leit, ka jingshit ka suiñ bneng ka la kham jem namar ka jingwan jong u slap kaba la ioh ban pyntngen noh ia ka khyndew- ka mariang bad kaba la ai jingim biang ia ki briew.
Wat la katta, don pat ki katto katne ki nongbah kiba hap sha ka phang North, kiba dang mad ia kajuh ka jingshit kyrang bad ka jinglhop ka suiñ bneng. Hapoh ka nongbah Sonora, ka shnong Aconchi ka ioh mad ia ka jingshit kumba 49 Degree Celsius lane kumba 120 Fahrenheit tad haduh jong ka Sngi Balang.
