Washington, Jylliew:
Ka United States ha ka Sngi Palei ka la pyntip ba ka don jingthmu ban die haduh $440 Million ki tiar thma sha ka Taiwan kum shi bynta ban ai jingkyrshan ia ka tnat iada ri jong ka Taiwan namar ki jingma kiba ap na ka jingshah ker sawdong ha ki nongshun ha kine ki sngi. Katei ka rai jong ka US ka long ruh hapdeng kum kane ka por ba ka Taiwan ka pynpaw ia ki jing-leh bymman jong ka China, nalor ka jingleh trai jong ka China ia katei ka ri dew lynnong kum la ka jong ka bynta.
Katei ka jingdie ia ki tiar siat bad tiar thma ka dang long kaba rit bad ka bym pat da heh haduh katta, hynrei ka long pat kum shi bynta ban ai jingiada ia ka Taiwan bad ba ka Taiwan kan ioh ban pynkhreh ialade lada kino-kino ki bor ba nabar kin leit ban pyni bor ne thombor ia ka ha ka por bym lah tip.
Katei ka rai jong ka US ha kane ka por, ka long ruh ha kum kane ka kynti ba ka United States bad ka China ki dang ialeh katba lah ban pynskhem bad pynneh ia ka jingiadei hapdeng jong kitei ki arliang ri, wat hadien shibun tylli ki jingjia bad jingïakynad kiba la pynjngai ia ka jingiadei hapdeng jongki.
Ka State Department jong ka US, ka la pyntip sha ka Congress ba kan die kumba $332.2 Million ki kuli 30mm bad $108 million pat na bynta kiwei- kiwei ki tiar siat bad tiar ban pyndonkam ha ki kali bad ki tiar thma jong ka Taiwan.
Kumta, la ong ba katei ka jingdie jong ka US ia ki tiar siat bad tiar thma ha kane ka kynti, kan iarap shibun eh ia ka Taiwan ba kan lah ban iada iala u jong u pud u sam lada ka hap ban iaid lyngba ia ki jingshah thombor ha ki bor ba nabar kumba la jia ia ka Ukraine ha kane ka por.
