Jerusalem, Naitung:
Ka tnat syntiat jong ka Israel ka la pynbna ba ka la lap ia ka jingthmu ba buhrieh jong ka Iran ban thombor ia ki heh nongkhaïi jong ka Israel hapoh Cyprus. Ka la phah ruh ban wad bniah bha namar la ioh jingtip ba ki don ki kynhun lehnoh na Pakistan kiba iadon kti lang ha kitei ki kam thombor.
Haba iadei bad ki kam thombor jong ki lehnoh hapoh Iran, ka Mossad ka la ioh bat ia u khlieh jong katei ka kynhun, u Yusef Shahabazi Abbasalilu, uba la ai jingtip bad phla lut hapdeng ka jingtohkit halor kitei ki jingthmu thombor hapoh Cyprus.
U Abbasalilu u ju ioh ia ki jingtip ba pher bad kumjuh ruh ia ki tiar siat dei na ki heh ka Iranian Revolutionary Guards na Iran. Hapdeng ka jingtohkit bniah, u Abbasalilu u la phla hakhmat ki lad pathai khubor ba u la iadon kti lang bad ki jingthmu thombor jong kitei ki kynhun ha ki katto katne ki bynta jong ka ri.
Kumta, la ong ba hapdeng ka jingtohkit jong ka tnat tohkit na Mossad, la pyntip ruh ba ia katei ka kynhun lehnoh la ioh ban tehlakam noh da ka tnat iada na Cyprus.
Ha ka video ba la pyllait da katei ka tnat syntiat jong ka Israel, la iohi ba utei u nong Iran u la phla ruh halor ka jingiadon kti jong ka ISI na Pakistan halor ka jingthmu ban pyniap ia ki nong Jiw bad ki nong Israel. Kumjuh ruh ia kitei ki nong Pakistan la ioh kem dang shen ha kine ki khyndiat por ba la leit, hadien ba la lap ia ki jingthmu thombor jongki pyrshah ia ki nong Israel.
U Abbasalilo u la phla ruh ia ka kyrteng jong uwei pat u ba iadei kam bad u, ia uba la tip kum u Hassan Shaoushtari Zadeh, uba long ruh u nongialam ba ha khlieh jong ka Islamic Revolutionary Guard Corps’ (IRBC) Foreign Intelligence Branch, ha kaba u la phla ruh ba dei une u heh uba long u khlieh nongialam bad u nongsuh buit haba iadei bad katei ka kam thombor.
Ha katei ka video, u Abbasalilo u la iathuh ba, dei ma u bad u Shoushtari Zadeh kiba iathmu bad suhbuit lang haba iadei bad ki kam thombor ha Cyprus. Kumta, la ong ba u Zadeh u la bthah ia u Abbasalilo ban leit rung sha ka phang North jong ka Cyprus, ha kaba un sa phah ia katto katne ki briew ki ban iarap bad ki ban iadei kam bad u na South jong ka Cyprus.
Shuh shuh ruh u Abbasalilo u la phla ba, u la leit ban tep ia baroh ki tiar siat kiba u la ioh pdiang ha kawei ka khlaw bad kitei ki tiar ki long kiba la phah da ka IRCH Intelligence Organisation.
Kumta, u la bud dien ia uwei u briew kumba la bthah ia u ban pyndep ia ka kam thombor ‘mission’ kaba la aiti ha u. Hynrei hadien ka jingbud dien jong u ia utei u briew, u ïohsngew ba ki don kiba la syntiat bad bud dien kylla ia u ha katei ka por. Kumta u la leit ban buhrieh noh ia kitei ki tiar baroh da kaba tep ha katei ka khlaw khnang ban lait na ka kti jong ki pulit.
La ong ba ki nong Iran ki thmu ban leit thombor ia ki nong Israel kiba don ha Cyprus, Turkey, Georgia bad ha Greece bad ki la aiti ruh ha katto katne ki kynhun na Pakistan ban iadon bynta lem ha katei ka kam thombor jongki.
Kumta, ka kynhun tohkit na Mossad ka la pyntip ba kan hap ban peit thuh ia ka jinglong- jingman bad ban pynjur ka jingsyntiat bad ban pahara naka bynta ka jingshngaiñ jong ki Jiw bad ki nong Israel ha kylleng ki bynta jong ka pyrthei.
Ha u Iaiong, ki pulit ka Greece ki la ioh kem ia 2 ngut ki nong Pakistan ba la suba don kti ha ki jingthmu thombor ha ryngkat ka jing iatrei lang bad ka Iran, da ka jingthmu ruh ban thombor pyrshah ia ki nong Israel bad ki Jiw kiba don ha Greece.
Kumjuh ruh ha u snem 2021, ka Israel ka la pynbna ba ki bor pahara ka Israel ka la ioh ban tehlakam ia ka jingthmu thombor jong ka Iran pyrshah ia ki katto katne ki heh nongkhaïi ba pawnam jong ka Israel hapoh Cyprus.
