Colombo, Naitung:
Katkum ki khubor la ong ba ka Sri Lanka kan ioh ban iasoi ia ka jing iamynjur bad ka World Bank halor ka $500 Million ka ban iarap ban pynkhie im ia ka ioh- ka kot jong ka Sri Lanka baroh kawei hadien ba la ioh ia ka jingmynjur na ka iing myntri ha ka Sngi Ba-ar. Kane ka long ka lad jingiarap kaba heh duh ba katei ka ri kaba la kyrduh, kan ioh pdiang ha kane ka kynti hadien jong ka International Monetary Fund ba la dep ban iakut ha u Lber.
Katei ka ri dew lynnong ka don ia kumba 22 million ngut ki paidbah nongshong shnong bad ha kine ki sngi ka la mad ia ka jingduk- jingkyrduh kaba jur tam eh kaba kam pat ju ioh mad ha ki 70 snem ba la leit. Watla katta, la ngeit ba ka ioh- ka kot jong katei ka ri kan hap ban hiar sa kumba 2% hapoh jong une u snem bad hashwa ba kan sdang ban khie im biang da kumno- kumno 7.8% ha u snem u ban wan.
Ki lad pathai khubor ha ka taiew ba la leit, ki la iathuh ba ka World Bank ka lah ban mynjur ia ka $700 Million kum ka lad jingiarap ban ai jingkyrshan bad ban pynkhie im biang ia ka Sri Lanka ynda la ioh ban shong jingialang biang ha ka 28 tarik u Jylliew, ha kaba katei ka $200 Million pat kan long naka bynta ki ‘Welfare Programme’.
Kumta, ka sorkar Sri Lanka ka la pyntip ruh ba katei ka mang tyngka ba la ia mynjur, kan wan ha ki 2 bynta.
Kumjuh ruh ha ka Sngi Palei, ka World bank ka la mynjur ban phah ia baroh $700 Million sha ka Sri Lanka kumba la iapynbeit bad kumba la kyrpad da ka Sri Lanka ha ki por ba la leit. Katei ka mang tyngka ka long katkum ka jingiakut ba la dep ban kular ha ka International Monetary Fund (IMF) kaba la dep ban shong jingialang ha u Lber.
Katei ka $500 Million ba la dep mynjur hashwa, kan long naka bynta ka ‘Budget Support’ bad katei ka $200 Million kaba la mynjur hadien pat ka long naka bynta ka ‘Welfare Support’ kumba la dep ban pyntip ba katei ka mang tyngka kan wan ha ki 2 bynta.
