Paris, Naitung:
Ki bor pyniaid jong ka France ha ka Sngi Thohdieng ki la phah thymmai biang sa kumba 45,000 ngut ki pulit ban leit pahara bad ban tem ia ki paidbah nongïakhih sha Paris hadien ka jingiakhih paidbah kaba jur namar ka jingshah siat iap u khynnah 17 snem ha ki khyndiat sngi ba la leit. Ha kane ka jingjia ki paidbah nongïakhih ki la thang ia ki kali bad pynjulor ruh ia katto katne ki jingtei jong ka sorkar, kum shi bynta ban pynpaw ia ka jingbitar halor ka jingleh don bor jong ki bor pulit pyrshah ia ki riew paidbah ha kane ka kynti.
Kumta, la ong ba ki bor pyniaid ki la hap ban phah da ki kynhun pulit bad ki bor pahara ban leit tem ia ka jingbitar ki paidbah bad kumjuh ruh ban tehlakam ia ka jingpyni bor jong ki paidbah ha kane ka por.
U President ka France, u Emmanuel Macron, hadien ba u la leit phai na ka jingialang Summit ka EU, ban iapyrkhat kam halor katei ka jingeh ba ka ri ka ioh mad ha kum kane ka por, u la pynpaw ruh ia ka jingsngew khia halor ka jingleh don bor jong kitei ki heh pulit da kaba shim syndon ia ka jingim jong utei u khynnah tang namar ka jingiaid lait jong u na ka jing talasi jongki ha katei ka jingjia.
La iathuh ba ka jingpyndep ia ka met ba sah jong utei u khynnah, ka long ha ka Sngi Saitjaiñ bad kan long ruh hapoh ka nongbah Paris kaba utei u khynnah u shong- u sah bad u la shah ban pyniap.
La ong ba u Macron u la ialeh katba lah ban tem ia katei ka jingiakhih paidbah kaba shyrkhei hapoh ka ri, da ka jing sheptieng ruh ioh katei ka jingiakhih kan dang heh bad jur shuh shuh bad kaba lah ban ktah ia ki kam ki jam bad ka jinglong- jingman hapoh Paris bad ha kylleng jong ka ri.
Kumta, ha ka Sngi Thohdien la phah ia ka kynhun khleh jong ki pulit bad ki bor pahara sha katei ka nongbah khnang ban tehlakam ia ki jingjia ba sngewsih kiba ap ia ki paidbah bad kumjuh ruh ia ki bor pyniaid na katei ka jingiakhih.
Ha kajuh ruh ka por la ong ba kine ki khyndiat kynta ki ban wan, ki lah ban long ki por kiba ap jingma bha ia ka Paris ioh katei ka jingwan poi ki kynhun pulit bad ki bor pahara kan dang pynkhie bitar arshah ia ki paidbah nongïakhih bad ki lah ban shim ia kano- kano ka rai kaba kyrkieh khlem da pyrkhat ia ki kynrum- kynram ki ban mih hadien habud.
