Guwahati, Naitung:
Ka jingpynkynriah jaka ïa ki briew ki bym don ïing don sem bad kumjuh ki nongkhrong ha Assam kiba la shu pynlong jaka sah ha khrum jong ki surok suiñ ka la ïai bteng.
Kumba la ïathuh ka tyllong khubor, la ong ba ka jingpynkynriah jaka ïa ki briew na kine ki jaka ka la sdang naduh ka sngi Ba-ar ha kaba haduh mynta ki bor sorkar ki dang pynlong ka jingkhmih bniah sha kylleng ki jaka khnang ban ïoh pynbiang jaka sah lut ïa ki briew ki bym don ïing don sem.
Kumba la sakhi, la ong ba ïa kiba bun ki briew la lap ba ki la pynlong jaka sah ha khrum jong ki lynti suiñ kiba don ha Ulubari ha ka nongbah Guwahati ha kaba ïa kine la ïalam noh sha ki jaka sah ba la pynbiang da ka sorkar da ka hukum jong u Myntri Rangbah u Himanta Biswa Sarma.
Hadien ka jingai hukum jong u Myntri Rangbah, u Deputy Commissioner jong ka Kamrup (Metro) u Pallav Gopal Jha u la leit sha katei ka jaka ha ka miet jong ka sngi Ba-ar jong ka taïew ba la lah bad u la pynïaid ïa ka jingpyntreikam na ka bynta ban pynkynriah jaka ïa ki nongkhrong na ki surok suiñ.
