“Ka Cabinet Committee on Economic Affairs (CCEA), kaba la khlieh da u Myntri Rangbah duh u Narendra Modi, ka la mynjur ia ka song tyngka ba kyrpang jong ki skhim na ka bynta ki nongrep ha ka jingmang tyngka kaba T. 3,68,676.7 klur. Kane ka song tyng-ka ka phaikhmat kyrpang sha ka bha ka miat bad ka ioh ka kot jong ki nongrep da kaba kyntiew ia ka rep ka riang kaba lah ban iaineh. Kine ki sienjam kin iarap ban kyntiew ia ka kamaikajih jong ki nongrep, kan pynkhlain ia ka rukom rep tynrai bad ka rukom rep bym pyndonkam dawai, kan pynkhie im ia ka jingseisoh ka khyndew bad ha kajuh ka por kan pynthikna ka jing-shngain ki marbam,” la ong u Dr. Mansukh Mandaviya, Myntri sorkarpdeng ba dei khmih ia ki Tnat Chemical and Fertilizers bad Health and Family Welfare haba ai jingkren ha ka jingialang lyngba ka bor internet bad ki Myntri ba dei khmih ia ka tnat ka rep ka riang jong ki Union Territory.
U Myntri sorkarpdeng ba dei khmih ia ka Tnat ka rep ka riang, u Narendra Singh Tomar bad ki Myntri ba dei khmih ia ka tnat ka rep ka riang jong palat 20 tylli ki Jylla bad ki Union Territory ki la iashim bynta lang ha kane ka jingialang lyngba ka bor internet.
U Dr. Mandaviya u la ong ba ka CCEA ka la mynjur ban bteng ia ka skhim urea subsidy ban pynthikna ka jingdon ka sboh urea na ka bynta ki nongrep ha ka dor kaba T. 266.70 ha man ka borni 45 kilo lait noh ki khajna bad ka jingkhein pisa ia ki sboh sop ne em. Ha kane ka song tyngka, ka la don ka jingkut jingmut ban mang T. 3,68,676.7 klur na ka bynta ka urea subsidy na ka bynta lai snem (2022-23 haduh 2024-25). Nalor kane ka song tyngka ka la don ruh ka Nutrient Based Subsidy (NBS) kaba la mynjur dang shen kaba T. 38,000 klur na ka bynta ka samoi Kharif jong u snem 2023-24. Ki nong rep kim donkam ban pynlut shuh shuh ban thied ia ka urea bad kane kan iarap ban pynduna ia ka jinglut jingsep jong ki.
Mynta, ka MRP jong ka urea ka long T. 266.70 man ka 45 kilo ka urea (laitnoh ka jingsiew na ka bynta ka sboh sop neem bad kiwei ki khajna) katba ka dor ba dei jong shi borni kalong kumba T. 2200. Kane ka skhim kadei kaba la bei tyngka pura da ka sorkar India lyngba ka jingmang tyngka.Da ka jingbteng ia ka skhim urea subsidy, ka jingpynmihsboh urea ha ka thain kan long kaba bun tam.
U Myntri ba dei khmih ia ka Tnat Fertilizers and Chemicals, u DrMansukhMandaviya u la ong ba ka Mei Mariang ka ju pynbiang kyrhai ki tyllong na ka bynta ka jingdap jingbiang ki briew. “Kalong kaba donkam kyrkieh ban kyntiew ia ki rukom rep tynrai bad ka jingpyndonkam ryntih bad kaba lah ban ianeh ia dawai sboh”, u la ong. Ka jingkyntiew ia ka rukom rep tynrai/ ka rukom rep bym pyndonkam dawai, kiwei kiwei ki sboh, ki sboh nano bad ki sboh bio ki lah ban iarap ha ka jingpynneh ia ka jinglong sboh ka khyndew jong ngi, u la bynrap.
U Myntri Sorkar Pdeng u la ong ruh ba la pyllait ia ka ‘Prime Minister’s Program for Restoration, Awareness, Nurturing and Improvement of Fertility of Mother Earth (PM-PRANAM) ban pynshlur ia ki jylla ban kyntiew ia ka jingpyndonkamryntih ia kiwei ki sboh bad ki sboh dawai.” U la kyrpad ia baroh ki Jylla ban iatreilang ban kyntiew ia ka rukom rep organic ban pynneh pynsah ia ka jinglong ka khyndew.
U la pyntip ba la pyllait T. 1451.84 klur na ka bynta ka Market Development Assistance (MDA) ban kyntiew ia ki sboh organic na ki Gobardhan plant. Ban kyrshan ka jingpyniaid iew iaki sboh organic kata ki Fermented Organic Manure (FOM) / Liquid FOM / Phosphate Rich Organic Manure (PROM) kiba la pynmih kum ki by-product na ki Biogas Plants/ Compressed Bio Gas (CBG) Plant ba la plie hapoh ka sienjam Gobardhan 1500 per metric ton kum ka skhim MDA ka long shi bynta.
Kum ia kine ki jaitsboh yn don hapoh ki kyrteng FOM, LFOM bad PROM. Ha kawei ka liang, kane kan plié lad ia ka jingpyndonkam ia ki mar ba tam na ki kam rep, bad kan iarap ruh na ka bynta ka mariang kaba khuid bad kaba shngain. Ha kawei pat ka liang, kan long ruh ka tyllong jong ka ioh ka kot ki nongrep. Ki nongrep ki lah ban ioh ia kine ki sboh organic ha ka dor kaba duna.
La wanrah ia ka sboh Sulfur Coated Urea (Urea Gold) ban pyndap ia ka jingdunasulphur ha ka khyndew bad pynduna ka jinglut jingsep jong ki nongrep. La wanrah ia ka Sulfur Coated Urea (Urea Gold) ha ka sien ba nyngkong ha ka ri. Kane kalong kaba kham duna dor bad kaba kham bha ban ia ka urea sop neem ba pyndonkam mynta.Kan pyndap ka jingduna sulphur ha ki khyndew ha ka ri. Kan pyntyngkai ruh ia ka jinglut ki nongrep bad kyntiew ia ka ioh ka kot jong ki ryngkat ka jingkyntiew ia ka jingpynmih ia ki mar rep.
U Dr. Mandaviya u la kyrpad ruh ia ki Jylla ban shim ia ki sienjam ban tehlakam ia ka jingpyndonkam sha kiwei ki kam ia u urea ba la mang na ka bynta ki kam rep bad ki nongrep. “Ka Urea ba la mang na ka bynta ki nong-rep ym dei ban pynpoi sha ki karkhana”, u la ban jur.
PIB
