Las Vegal, Naitung:
Ka nongbishar jong ka Clark County District Court, ka Kathleen Delaney, ha kane ka kynti la rai set patok kumba 16 haduh 40 snem kynthih ia utei u khynnah na Las Vegas halor ka jingleh khlemakor bad ktah kti jong u ia ka nonghikai jong u tang namar ka jingkylli jongka ia ki marks jong u hadien ba la wad skul.
Katei ka nongbishar ka la ong ba kane ka long ka jingpynkheiñ aiñ kaba khraw tam ba ka ïingbishar ka la ïohsngew ha kaba utei u khynnah u la ktah kti bad batbor syndon ia la ka jong ka nonghikai skul tang namar ba ka kylli ia u shaphang ki marks kiba u ioh ha ka eksamin ba la dep.
Kumta, ka ïingbishar ka la ong ba u Jonathan Eluterio Martinez Garcia, 17 snem ka rta, u la leh ia katei ka kam pynkheiñ aiñ bad ka kam pyniap briew, da ka jingthmu ruh ban batbor ia katei ka nonghikai bad u la pynmynsaw ruh ia katei ka briew da ki tiar kiba shyrkhei. U Jonathan u la shah pynngat ha shibun tylli ki kyndon pynkheiñ aiñ ba iahap bad ka jingleh pynkheiñ aiñ jong u ha katei ka kam.
Kane ka la jia hapoh ka skul Eldorado High School, ha kaba utei u khynnah bad katei ka nonghikai ki iadon bynta.
Ha ka Sngi Balang, u Jonathan u la panmap hakhmat ka ïingbishar halor katei ka jingleh pynkheiñ aiñ jong u. U nongïasaid aiñ jong u ruh u la pynksan bad ong ba utei u khynnah u leh ia katei ka kam thombor namar ka jingktah ha kaba iadei bad ki jingshitom kiba pynthud ia ka bor pyrkhat jong u.
Ha u Iaiong jong u snem 2022, utei u khynnah u la ktah kti ia katei ka nonghikai hapoh ka kamra skul, ha kaba u la ksih ia ka bad u la sangah ia ka khlieh jongka ha ka miej ba ka shong bad u da ong ruh ba um sngewtynnad bad um kwah shuh ban iohi ia ka. Namar ba ka dei ka riew kynthei, katei ka nonghikai kam shym lah ban iakhun pyrshah bad kumta ka la iapler noh hangta. Hynrei hadien kata, ka la kyndit bynriew biang, ha kaba ka la shem ba utei u khynnah u la pyn law ia ki jaiñ ba ka phong na syngkai sharum bad ha kata ka por u la theh ia ka da ka kynja um ha ka met jongka baroh shi rynieng.
Hadien kata, katei ka nonghikai ka la iathuh ha ki pulit ba utei u khynnah ha katei ka por u la thmu ban thang syndon ia ka hynrei u la kylla jingmut noh bad tynrong ha ka da ki kot kiba khia bad u la shong syndon halor jong ki kot kiba la tynrong ha ka.
Katei ka nonghikai ka la iathuh ba hapdeng katei ka por ka la iapler noh bad utei u khynnah ruh u la phla ba ha ka por ba kam tip briew shuh, u la batbor ia ka bad u la pyrshang pat ban pyniap noh syndon ia ka hynrei um lah satia ban leh kumta.
