Paris, Naitung:
Ka sorkar France ha ka Sngi U Blei ka la pyntip da ki spah ngut ki la shah kem biang ha ka miet kaba san jong ka jing-iakhih paidbah hapoh Paris namar ka jingshah siat iap jong uwei khynnah 17 snem ha ki heh pulit ha ki khyndiat sngi ba la leit.
La ong ba ki paidbah nongïakhih, khamtam ki khynnah- samla, ki la pynpaw ia ka dak jingbitar jongki da kaba thang kali bad pynjulor ia ki tiar paidbah bad kumjuh ruh ki la pyrshang ban iakhun ia ki pulit kiba ap pahara kum shi bynta ban ïakhih jur ia ka jingleh donbor jong ki heh pulit pyrshah ia ki riew paidbah ha katei ka thaiñ.
Katei ka jingiakhih paidbah ka la jia hadien ka jingshah siat iap jong u khynnah 17 snem ba la tip kyrteng u Nahel tang namar ka jingiaid lait jong u na ka jaka talasi jong ki nong-ap pahara ha katei ka por.
Ha ka video ba la saphriang paidbah, la iohi ia uwei u heh pulit uba thew bad pyn-ap da ka suloi ia utei u khynnah katba u dang ñiah ia ka kali na katei ka jaka. Dei lyngba jong katei ka video bad ki khynnah- samla ki la khie bitar halor ka jingleh jong ki bor pulit bad ki la mih shakhmat ban pynpaw ia ka jingbitar jong ki da ka jingiakhih paidbah kaba jur.
Hadien ka sngi ba la pyndep don burom ia ka met u Nahel hapoh ka iingsah jong u ha Paris, ki pulit ki la ioh kem kumba 719 ngut ki nongïakhih ha katei ka miet bad kane ka long hadien ba 1,300 tam ki la shah kem ha ka miet ba la lah.
Kumba 45 ngut ruh ki heh pulit, la ong ba ki la mynsaw hapdeng jong katei ka jingiakhih paidbah, ha kaba 577 tylli ki kali ki la shah thang bad 74 tylli ki iing ki la shah thang bad lada shim kyllum ia baroh ki jingthang kali bad jingthang iing ka la poi kumba 871 tylli kum kitei ki jingjia tang hapoh jong ki 4 sngi ba la iaid ka jingiakhih paidbah ki nongshong shnong ka nongbah Paris.
