Colorado, Naitung:
Ki pulit ka Colorado ki la iathuh ba uwei u khynnah 16 snem u la thombor bad pyniap ia ka paralok barim hakhmat u para jong ka tang namar ka jingpan iakhlad.
Halor kane ka jingjia ka Weld County District Court Division 17, ka la shim ia u Jovanni Sirio- Cardona kum u samla bad kam pynhap shuh ia u hapoh ka kyrdan jong ki khynnah ba hapoh ka 18 snem ka rta, namar katei ka kam bymman.
Katkum ka kaiphod ba la ioh ha ka 16 tarik u Jylliew ha ka por kumba 3:45 noh phai sngi, la iohi ia utei u khynnah 17 snem ha ka por ba u leit poi sha ka jaka sah jong ka Lily da ka thuk-thuk jong u hapoh Greeley, ka shnong kaba don hapoh Denver. Katei ka jingjia ka long 5 sngi h ashwa ka sngikha jong katei ka khynnah, ha kaba utei u khynnah runar u la leit ban rung jubor na ka jingkhang iit jong ka kamra thiah jong ka ha katei ka janmiet.
Katkum ka ejahar ba la ujor pyrshah ia utei u khynnah, la ong ba ka Lily ha katei ka por ka la lynñiar bad pyrta ia u para ba 13 snem jongka, uba ha katei ka por, u dang peit TV ha kawei pat ka kamra bad tang mar ia ïohsngew ia ka sur jongka, utei u para u la leit ban mareh mar-mar sha ka kamra jong ka Lily hynrei hashwa ba un poi hapoh ka kamra jongka, u la ïohsngew ia ka jingsawa ka suloi.
Utei u khynnah 17 snem u la dep siat kumba katto- katne kuli ia katei ka khynnah 15 snem ha katei ka por ba u para jongka u leit ban rung ha ka kamra jongka.
Utei u para jong ka Lily, u la iathuh ha ki pulit ba ha katei ka por ba u leit rung hapoh ka kamra jong ka hynmen, u la ioh ia ka Lily ba ka la kyllon ha madan bad utei u paralok ‘boyfriend’ jong ka pat uba dang bat ia ka suloi ha ka kti jong u. Ha katei ka por, u shem ruh ia u Sirio-Cardona ba u ïeng hajan ka Lily ha ryngkat ka snam kaba tuid na ki thliew khmut jong u.
Ha katei ka por, u para jongka Lily u la pyrshang ban wad jingiarap hynrei la ong ba u Cardona u la knieh ia ka phone na ka kti jong u para khnang ban pyntikna ba un nym lah ban pyntip shano- shano ruh.
Hadien katei ka jingjia, ki pulit ki la ioh jingtip bad ki la leit ban mareh sha katei ka iing hynrei ka long kaba lehnoh ei namar ka Lily ka la khlad bad la shem ia katto katne ki dak mong kuli ha ka met jongka.
Katkum ki kaiphod ba la ioh da ka ïingbishar, la shem ba katei ka khynnah 15 snem ka don jingiadei bad utei u khynnah 17 snem la kumba 6 bnai eiei. Hynrei ha katei ka por, ka Lily ka la rai ban pynkut noh ia ka jingiadei jongki bad dei kane ka daw kaba la wanrah ia katei ka jingjia ha katei ka por.
