Paris, Naitung:
Katkum ki khubor la ong ba, ka United States ka lah ban long ka ri kaba la ai jingkyrshan bad phah bun tam ki jingiarap bad jingnoh synñiang sha Ukraine naduh ba sdang ka jingleit hiar thma ka Russia tat haduh kane ka kynti.
Katto katne ki ri kiba la kham iarap jur ia ka Ukraine ki long ka US bad ka Germany, ha kaba baroh ki jingiarap ba ka United States ka la phah haduh kane ka kynti ka long kumba 70.7 Billion Euros naka bynta ka tnat shipai jong ka Ukraine. Kaba ar pat ka dei ka ri Germany kaba la phah kumba 18.01 Billion Euros, ha kaba 10.68 Billion Euros ka long lyngba ki tnat iarap jong katei hi ka ri bad 7.33 Billion Euros pat lyngba jong ka European Union. Ka ri kaba lai napdeng ki ri kiba la phah jingiarap bun tam sha Ukraine, ka long ka United Kingdom bad baroh ki lad jingiarap ba ka UK ka la phah sha Ukraine ka la kot ia ka 10.74 Billion Euros.
Nalor jong kitei ki ri ba hapoh ka dew bah Europe pat, ka ri kaba la phah bun tam eh ki lad jingiarap sha Ukraine ka dei ka Japan, haduh 6.62 Billion ki jingiarap kiba ka la phah sha Ukraine haduh kane ka kynti.
Katba ka Poland pat ka long ka ri ba nyngkong ha u snem 2022 ban ai jingkyrshan ia ka Ukraine da ki tup iakhun thma, ki kali thma bad kiwei kiwei de. Ha une u snem 2023 pat, ka Poland ka la ioh ban phah ia 2 tylli ki tup ‘Leopard’ kiba ka thied na ka Germany.
