Beijing, Naitung:
Ka China ka la pdiang sngewbha ia 2 tylli ki jhad thma ka Russia kiba la dep iaid lyngba ia ki bynta jong ka duriaw ka Taiwan bad Japan ha kine ki khyndiat por, bad ha kane ka kynti la khmih lynti ba ka China kan pyn kilan ia kitei ki shipai duriaw ka Russia bad ki jong ka China naka bynta ka jingiadei kaba kham skhem hapdeng jong kitei ki arliang ri.
Kumta, la ong ba kitei ki jhad ‘Gromkiy’ bad ‘Sovershenniy’ ki la leit poi sha ka jaka sangeh jhad jong ka China hapoh ka nongbah Shanghai ha ka Sngi Balang bad ki dang pynkhreh ban sdang noh ia katei ka jing kilan bad ki tnat shipai duriaw jong ka China ha kine ki khyndiat kynta ki ban wan.
