Shillong, Naitung 30:
Ka PFR Football Academy ka la lah ban pynliem noh ïa ka Mawtneng Sports Club da 2-0 kol ha ka jingïalehkai jong ka lympung Knockout Football Tournament ba la pynlong da ka Ri Khasi SCSC ha Madan Kurkalang, Bhoirymbong.
Haba phai sha kane ka jingïalehkai kaba la long ha ka sngi Saitjaiñ, ïa ki ar tylli ki kol jong ka PFR Academy la khyrwit da u Samlang Rympei ha ka minit ba 64 bad u Fairming Suting ha ka minit ba 80.
Ka jingïalehkai ban wan jong kane ka lympung kan long hapdeng ka Meghalaya Police pyrshah ïa ka Mylliem Sports Club ha ka 2 tarik Nailar, ka ban dei ruh ka jingïalehkai kaba khatduh jong ka round kaba nyngkong.
Ka jingïakhun ïa ka pre-quarterfinals kan sdang naduh ka 5 tarik Nailar ka ban long hapdeng ka Risyon Football Club pyrshah ïa ka Shillong Lajong Football Club reserves.
