Shillong, Naitung 30:
Ki ar tylli ki ri ki la shaïong hi ngaiñ hadien ba ki la shah pynliem noh ha ki jingïalehkai pyrshah kaba la long ha ka lympung FIFA Women’s World Cup 2023 ha ka sngi U Blei.
Haba phai sha ka jingïalehkai, ka kol kaba la ïoh ban khyrwit da ka Manuela Vanegas ha ka minit kaba 97 ka la pynshaïong hi ngaiñ ïa ka Germany kaba la mad noh ïa ka nam rem hakhmat ka Colombia.
Ha kane ka jingïalehkai, ka Linda Caicedo ka la ïoh ban khyrwit ïa ka kol kaba nyngkong jong ka Colombia hynrei ha shwa ban wai ka jingïalehkai ha ka minit ba 89, ka Germany ka la ïoh ban pynphai ïa kane ka kol lyngba ka Alexandra Popp hynrei ka kol kaba la ïoh thep da ka Vanegas ka la pynlong ïa ki nongkyrshan ka Colombia ban kmen bad shad ha madan phutbol kaba ha Sydney, Australia.
Kane kan dei ka jingshah rem kaba nyngkong eh jong ka Germany ha ka group stage jong ka lympung World Cup, kata naduh u snem 1995.
Ka jingïalehkai ba khatduh jong ka group kan long ha ka 3 tarik Nailar, ha kaba ka Colombia kan ïakhun pyrshah ïa ka Morocco bad ka Germany pyrshah ïa ka South Korea.
Kumba ka long mynta, ka Colombia ka donkam tang shi point ban don hakhlieh duh jong ka group, katba ka Germany ka donkam ban jop ban pynthikna ban jam sha kawei pat ka kyrdan.
“Ka long kaba shisha, ba phi donkam ban kmen bad mastieh namar kane ka dei ka jingjop kaba khraw na ka bynta ka ri baroh kawei,” la ong u Assistant Coach ka Colombia u Angelo Marsiglia.
Ha kawei pat ka jingïalehkai, ka Morocco ka la khur ïa ka jingjop kaba nyngkong eh ka jong ka, ha ka lympung Women’s World Cup hadien ba ka la pynshaïong hi ngaiñ ïa ka South Korea.
Ka Ibtissam Jraidi ka la khyrwit ïa ka kol kaba nyngkong jong ka Morocco ha kane ka World Cup ban pynjop ïa kane ka ri kaba bat ïa ka kyrdan kaba 72 ha ka pyrthei bad pynshaïong ngaiñ ïa ka South Korea kaba bat ha ka kyrdan kaba 17.
“Ngi da sngewkmen eh shi katdei ba ka jingtrei shitom jong ki, ka la seisoh. Kane ka jingjop ka dei na ka bynta ka Morocco bad Arab, u dei u soh jong ka jingtrei shitom ka jong ngi,” ong u Jraidi.
Kumba ka long mynta, ka South Korea ka la shah rem ha baroh ar tylli ki jingïalehkai bad kan hap ban jop ha ka jingïakhun pyrshah ïa ka Germany.
Ha kiwei pat ki jingïalehkai, ka Norway ka la lah ban pynliem noh da 6-0 kol ïa ka Philippines bad ka Switzerland ka la ïakhaid ha ka jingïakhun pyrshah ïa ka New Zealand.
