Shillong, Nailar 06:
Ka lympung ïalehkai U-20 4th Division Football League 2023 ba la pynïaid da ka Shillong Sports Association ka la nangjam shaphrang ha ka sngi Saitjaiñ ha madan Polo.
Ha ka jingïakhun kaba nyngkong hapdeng ka Mawkasiang SC bad ka Madanrting SC ki la ïasam mar shi point hadien ba ïakhaid mar 1-1 kol. Ka Mawkasiang ka la ïoh pynkhih jar nyngkong eh lyngba u Donald Roy Suting ha ka minit kaba 19, hynrei u Nicholes Kshiar (51) u la lah ban pynïakhaid kylla na ka bynta ka Madanrting.
Haba phai sha ka jingïakhun hapdeng ka Kharang SC bad ka Laitumkhrah SC ki la ïasam mar shi point hadien ba kim shym lah ban thep kol haduh kaba kut ka jingïalehkai.
Ka jingïalehkai ha ka Lah Sngi U Blei kan long hapdeng ka Lummawbah SC pyrshah ïa ka Pynthorbah SC ha ka por 2 baje, katba ka Mawklot SC ïa ka Mawpdang SC ha ka por 4 baje janmiet.
