Shillong, Nailar 07:
Ka Lummawbah SC bad ka Mawpdang SC ki la khur ïa ka jingjop kaba nyngkong na ka Group-C ha ka lympung ïalehkai U-20 4th Division Football League 2023 ba la pynïaid da ka Shillong Sports Association ha ka Lah Sngi U Blei ha madan Third Ground, Polo.
Ha ka jingïakhun kaba nyngkong, ka Lummawbah SC ka la pynliem noh ïa ka Pynthorbah SC da 4-2 kol.
Ha kane ka jingïakhun ka Lummawbah ka la pynkhih jar nyngkong eh lyngba u Kevin C Royne ha ka minit kaba 27. Hashwa ban kut ka jingïalehkai jong ka kylla step ka Pynthorbah ka la lah ban pynphai kylla ar kol lyngba u Juviar Kharkongor (41) bad u Manbha Pohshna (45) na ka bynta ban tam da 2-1 kol.
Hadien katto katne por ba la bteng ïa ka jingïakhun jong ka kylla miet, ka Lummawbah ka la ïakhun tyngeh ha kaba ka la lah ban pynïakhaid kylla lyngba u Andy Khmah (59). Kane ka kynhun ka la thep biang sa ar kol lyngba u Jefferson Pakynteiñ (61) bad u Nathaniel Kharnaior (67) na ka bynta ban khur syndon ïa ka jingjop.
Haba phai sha ka jingïakhun ba ar jong kane kajuh ka group, ka Mawpdang SC ka la jop da 4-2 kol ïa ka Mawklot SC bad u Garrywell Syiem u la khur ïa ka hat-trick.
Tang ha ka kylla step ka Mawpdang ka la ïoh ban thep haduh lai kol lyngba u Garrywell ha ka minit kaba 25 & 41 bad ïa kawei pat la pynbud da u Patsha Syiem (30). Hynrei ka Mawklot ka la lah ban pynphai shi kol lyngba u Ïaiskhem Nongdhar (43).
U Garrywell u la khur syndon ïa ka hat-trick hadien ba u la ïoh ban thep ïa ka kol kaba lai ha ka minit kaba 48. Hadien katto katne por ka Mawklot ka la lah ban pynphai ïa ka kol kaba ar lyngba u Pyntyllilang Dkhar ha ka minit kaba 53 hashwa ba kan mad ïa ka jingshah rem kaba ar ha kane ka lympung.
Kane ka lympung kan bteng biang ha ka sngi Ba-ar ha kaba ka Mawkriah West SC pyrshah ïa ka Risa Colony SC ha ka por 2 baje bad ka Pommura SC ïa ka Mawnianglah Youth SC ha ka por 4 baje janmiet.
