Washington, Nailar:
Ki bor pahara duriaw jong ka United States ha Florida ki la pyntip ba ki la ioh ban pyllait im ia uwei u briew uba dang ha ki rta ba 20 snem tam hadien ba ka lieng ba u shong ka la kylla khongpong ha ka por ba u leit poi ha ka bynta jong ka Atlantic Ocean ha jan jong ka rud duriaw Florida.
Ia utei u samla 25 snem, la ithuh kyrteng u Charles Gregory bad u la sahkut bad jah ha katei ka duriaw la kumba 24 kynta eiei naduh ba u mih da katei ka lieng ha ka miet Sngi Palei. Kumta, ha ka Sngi Thohdieng ki bahaiing jong u, ki la leit ban ujor sha ki bor pahara duriaw halor ka jingjah rngai jong u naduh katei ka miet Sngi Palei ba u mih na ka jaka sah.
Hadien ba ka tnat pahara ka la phah ia ka liengsuiñ HC-130 Hercules ban leit syntiat bad swait kylleng jong katei ka duriaw, la iohi ia u Gregory ha ka step Sngi Saitjaiñ, ha kaba u la shong halor jong katei ka lieng kaba la kylla khongpong. Hadien kata, ka kynhun ki bor pahara Cutter Coho ka la leit pyllait ia u bad ka la pynpoi noh ia u sha Station Mayport, ha ka la pynpoi pat ia u sha Vilano Beach.
Ki la pyllait ruh ia ka video ba ki ioh ban ring ha ka por ba leit ban pyllait im ia u ha ka por kumba 10:40 jong ka step Sngi Saitjaiñ, ha kaba la iohi ia u Gregory ba u la kaweh kti sha ki bor pahara duriaw tang mar ia iohi ia ka jingleit poi jongki sha katei ka jaka ba u sahkut. U Raymond Gregory, u kpa jong utei u samla, u la iathuh ba u khun jong u, hadien ba la wan phai sha iing, u iathuh ba ha katei ka jingleit jong u, kynsan ka la khie ka jing-at phyllung bad wat ka jaket ban pynper ha um ruh ka la hap noh ha ryngkat bad ka mobile phone jong u.
Dei ha katei ka por ba utei u samla u la iohi ia ki dohkha shark bad u la kem ka jingtieng kaba khraw, ha kaba u la shu dwai Blei beit hapdeng jong kitei ki 30 kynta kiba u hap ban shong marwei hapdeng jong katei ka duriaw bad ka jingiakren jong u bad u Blei ha katei ka por ka la kylla hi bak bad um pat ju leh kumtei mynno- mynno ruh ha ka jingim jong u.
Haba iadei bad kane, ka kmie jong utei u samla, ka Debra Gregory ka la ai khublei kyrpang ia ki bor pahara duriaw kiba la sngap ia ka jing ujor jongki bad kiba la kloi ban leit pyllait im ia u khun jongki ha katei ka jingjia.
