Islamabad, Nailar:
U Myntri Rangbah ka Pakistan, u Shehbaz Sharif ha ka taiew ba la leit u la ong ba ka Pakistan ka kwah ban iakren pynbeit noh bad ka India halor bun tylli ki mat kiba la pynsniew bad pynthut ia ka jing-iadei hapdeng kitei ki arliang ri naduh ki por ba la leit, da ka jingiatrei lang ruh ban kiar na ka thma, hynrei ban iasnoh kti lang na ka bynta ban iakhun bad ban rat dyng-khong ia ka jingduk bad ka jingkyrduh kam ha Pakistan bad India.
U Shehbaz Sharif u la kren ia kitei ki kyntien ha ka por ba u ai jingkren paidbah ha ka sngi plie ia ka Pakistan Minerals Summit. Katei ka jingialang ba la wanrah hapoh ka thong ‘Dust to Development’, ka long ban wanrah ia ki mang tyngka na shabar naka bynta ban pynkhie im biang ia katei ka ri (Pakistan) kaba la dap ram bad kaba la jan khyllem noh ha kine ki snem ba la leit. Kumta, u Sharif ha katei ka sngi u la ong ba ka Pakistan ha kane ka por, la pynkhreh ban iakren bad ban iabeit- ïasuk noh bad ki para marjan ri naka bynta ka jingbha bad ka jingiatrei lang ha ki por ban wan.
Namar kumba la ju tip hi ba ka thma kan ym lah ban wanrah jingmyntoi eiei ia kano- kano ruh ka ri. Hynrei ka thma kan wanrah pynban ia ki jing julor bad jingduh nong ha kiba bun ki liang.
Katei ka jingkren na utei u nongialam ka Pakistan ha kane ka por, ka long ruh ha kum kane ka kynti ba ka India ka dang thalaiñ ia katei ka ri namar ka jingjur jong ki kam thombor ki lehnoh bad ka India ka la kynnoh ba dei ka Pakistan hi kaba ailad ia ki lehnoh jongka ba kin wan rung tuh sha India bad ban wanrah ia ki kam thombor jongki hapoh India.
Ha katei ka jingkren jong u, u Sharif u la pynmih ruh ia ka kyrteng ka ‘Kashmir’ bad u la ong ba kumba ka India hi ka ju kren na ka por- sha ka por ba ka Jammu & Kashmir ka long jong ka India bad kan iai long beit ruh ka bynta jong ka India kumba ka dei hok ban long baroh shi katta.
La khmih lynti ruh ba ka National Assembly ba mynta jong ka Pakistan, kan sa kut noh ha kine ki khyndiat sngi ban wan shuwa ban kut noh ka samoi treikam jong kane ka sorkar ba mynta, khnang ban ioh ai por thymmai pat naka bynta ka ilekshon ka ban wan.
Shuh shuh ruh utei u nongialam, u la kren shaphang ki jingjia bad ki thma hapdeng ka India bad Pakistan ha ki por barim, ha kaba kitei ki jingïakynad bad ki thma, kim shym wanrah jingmyntoi eiei ia baroh arliang ri hynrei dei tang ki jing julor, ka jingduk, ka jingkyrduh kam bad ka jingbym ia beit shuh para briew bad para marjan ri.
Ha kajuh ka por ruh u la ong ba ka jingdon jong ka Pakistan ia ki tiar Nuclear, ka long naka bynta ban iada ialade hynrei ym pat ban leit thombor ia kiwei ki ri.
Kumta, ha katei ka sngi, u Sharif u la pynshai ba ka Pakistan kam ju buh jingmut ban pyndonkam ia ki tiar Nuclear lane ban wanrah jingma ia kiwei pat ki ri kumba ka India ka pharep man ka por. Bad ka long ruh kaba donkam ia ka India ba kan sngewthuh bad ba kan pyrkhat ia kane khnang ba kan ym buh dieng pynkiang hapdeng ka jingiadei jong ka Pakistan bad ka India ha ki sngi ban wan.
