UK, Nailar:
Ha kane ka khubor la ong ba sa uwei pat u khñiang jingpang Covid-19 u la wan mih thymmai hapoh United Kingdom, bad kaba la wanrah jingma ia ka pyrthei baroh kawei hadien ba ki heh ka Britain ki la maham ia ki paidbah halor ka jingwan mih thymmai jong utei u jait khñiang jingpang Covid. Utei u khñiang jingpang ba thymmai u dei u ‘Variant EG.5.1 bad la khot ia u- u ‘Eris’ bad u dei u ba la kha thymmai ne kylla dur na u khñiang jingpang Covid barim- u ‘Omicron’,
Ia une u khñiah EG.5.1 la lap hadien ba ki heh ka koit ka khiah ki la phah peit bniah ia ki paidbah nongleit- nongwan bad kiba leit poi sha Britain naduh ka 3 tarik u Naitung hadien ba la lap ia ka jingbun kiba ioh kem pang Covid ha utei u bnai khamtam ha ki ri ka Asia.
Kumta, la ong ba utei u khñiang jingpang ‘Eris’ uba wan mih thymmai ha kane ka por, un sa ktah jur ia ka Britain bad ia kiwei ruh ki ri ha kine ki sngi ban wan.
Katkum ka kaiphod ba la ioh lum da ka UKHSA ha ka 3 tarik u Nailar, ka jingdon kiba ioh pang Covid hapoh katei ka ri ka la kiew stet bha bad ki don palat 4,396 ngut kiba don ia ki jingshitom ba shem jingeh ban ring mynsiem. Kumta la ong ba kane ka long ka dak jong ka jingkhie biang ka khlam Covid ba thymmai hapoh Britain bad ba ka pyrthei baroh kawei ka donkam ban shim khia khlem da pynslem shuh.
Ki jingpang ba kloi ban paw shabar hadien ba ioh kem ia utei u khñiang jingpang ‘Eris’ ki long kum ka jing synriah, baiongkhlieh, pang ryndang bad kiwei kiwei.
La shem ba une u khñiang jingpang ba thymmai u long uba kloi haduh katta ban pur na uwei u briew sha uwei pat bad ia kane la sakhi hadien ba la iohi ia ka jingkiew stet ha ka jingdon kiba ioh pang hapoh Britain.
Ki heh ka Britain ki la iathuh ba khlem da pynslem ne ailad ia ka jingpang ba kan nang pur stet sha ki bynta bapher jong ka ri, ki la ialeh ban tehlakam ia katei ka jingpang da kaba pynjur ia ka jingpeit bniah khamtam ha ki jaka rung- jaka mih ha ka ri katba ka jingdon kiba ioh pang ka dang kiew stet.
U heh ka WHO, u Director General Tedros Adhanom Ghebreyesus u la ong ba watla ki paidbah nongshong shnong ki la dep ban shim ia ka tika dawai iada hynrei ki bor pyniaid jong ki ri ka pyrthei baroh kawei kim dei ban leh sting hynrei ki dei ban shim khia bad ban tehlakam noh katba dang biang ka por.
