Jerusalem, Jymmang:
U Myntri Rangbahduh ka Israel, u Benjamin Netanyahu haba ai jingkren sha ki nongthoh khubor jong ka CBS News ha ka Sngi U Blei, u la ong ba ka Israel ka la kwah ban pynkut noh ia ka jingkyrshan jong ka US ia ka tnat shipai jong ka Israel bad kane ka long ruh hadien kumba 10 snem ba ka Israel ka la sdang ban pynkhlaiñ ia ka jingiadei bad kiwei pat ki ri jong ka Gulf.
“Nga kwah ban sei ia ka jingkyrshan pisa jong ka America, ka bynta pisa jong ka jingiatreilang ha ki shipai kaba ngi don”, la ong u Netanyahu ha ka prokram “60 Minutes” jong ka CBS News.
U Netanyahu u la ong ba ka Israel ka ioh kumba $3.8 billion na ka jingiarap shipai jong ka US ha ka shisnem. Ka US ka la mynjur ban ai jingiarap shipai haduh $38 billion sha ka Israel naduh u snem 2018 haduh u snem 2028.
Hynrei ka dei ka por kaba biang bha ban lah ban pynbeit biang ïa ka jingïadei ha ka liang ka pisa tyngka hapdeng ka US bad ka Israel, ong u Netanyahu.
“Ngam kwah ban ap ia ka Congress ban wan”, u la ong ha ki nongthoh khubor. “Nga kwah ban sdang mynta.”
Ka Israel ka la don la slem bha ka jingïasngewthuh jingmut hapdeng ki arliang mamla hapoh ka US Congress na ka bynta ka jingïarap shipai, hynrei ka jingkyrshan na ki nongthaw aiñ bad ki paidbah ka la nang tyrkhong naduh ba la sdang ka thma ha Gaza ha u Risaw jong u snem 2023.
Shiphew percent na ki rangbah jong ka US ki don ka jingpyrkhat kaba sniew shaphang ka Israel, bad 59% ki don tang khyndiat ne kim don jingshaniah eiei ha u Netanyahu ban leh ia kaba dei ha kaba iadei bad ki kam pyrthei, ong ka jingwad bniah jong ka Pew kaba la pynlong ha u Risaw. Baroh ar tylli ki jingkhein ki la kiew da hynriew percent na kaba shisnem mynshwa.
U Netanyahu u la ong ba ka jingsniew jong ka jingkyrshan ïa ka Israel ha America “ka ïadei jan 100% bad ka jingkiew jong ki lad pathai khubor.”
U la ong ba katto katne ki ri, kiba um shym la ithuh, ki la “pyndonkam bakla” ia ki social media ha ka rukom kaba “pynmynsaw jur ia ngi,” watla ma u hi um ngeit ha ka jingpynbeit pud.
