Jowai, Nailar 07:
U MLA ka Jowai, Bah Wailadmiki Shylla u la pynbna ba u la mang lypa ïa ka song pisa ïa kino-kino ki skul na ka konstitwensi jong u kiba lah ban khur ïa ka nam lahduh ha ka lympung ïalehkai jong ka State Level Subroto Mukherjee Cup.
“Katba nga dang long u MLA, ngan synñiang T. 1 lak tyngka ïa kino-kino ki skul hapoh ka konstitwensi jong nga, kiba lah ban khur ïa ka nam lahduh ha ka lympung ïalehkai State Level Subroto Mukherjee Cup,” la pynpaw u Bah Wailad ha ka jingïalang pynkup burom ïa ki 16 ngut ki khynnah ïalehkai Under-14 Boys jong ka H.K. Singh Memorial Secondary School kiba la wanrah nam ïa ka skul bad ka District ha ka State Level Subroto Mukherjee Cup Football Tournament ba la pynïaid da ka tnat Directorate of Sport & Youth Affairs, dangshen ha ka nongbah Shillong.
Kum ban shu pynkynmaw, ki khynnah ka H.K. Singh Memorial ki la khur ïa ka nam lahduh hadien ba ki la pynliem ïa ka K.B Memorial Secondary School kaba na East Jaiñtia da 4-1 kol lyngba ka tie-breaker.
Kum ka jingai mynsiem ïa kine ki khynnah, ki bor pynïaid jong ka skul H.K. Singh Memorial ki la pynlong ka jingïalang pynkup burom ha kaba la wan sakhi lang da u MLA kum u kongsan ha ryngkat ka jingïadon lang ka District School Education Officer ka Kong A. Syiem, ki MDC ka JHADC, u District Sports Officer (DSO) ka West Jaiñtia, Bah Khroobok Passah, ki dkhot ka WJDSA kiba kynthup ïa u Bah EMH. Passah, Bah Lammat O Laloo, Bah Patrick Lamare, ki nongïalam niam ka Balang Unitarian, ki nonghikai, ki kmie ki kpa bad ki khynnah skul.
U Bah Wailad u la pynpaw ruh ka jingsngewkmen bad ai ka jingïaroh kaba kyrpang ïa kine ki khynnah kane ka skul ki ban leit mihkhmat ïa ka Jylla sha Bangalore ka ban sdang naduh ka 30 tarik Nailur haduh 10 tarik Risaw mynta u snem.
Nangta, u la ai mynsiem ruh ïa ki ban ïalehkai bha bad ban trei shitom ban ïoh rah ïa ka nam lahduh bad wanrah ruh ïa ka nam ka burom ïa ka skul, ka District bad ïa ka Jylla.
Ha kawei pat ka liang, u Bah Khroobok u la pyntip ba ka jinglut jingsep baroh na bynta ban leit ïashim bynta sha Bangalore yn pynlut hi na ka shlem treikam u DSO.
Shwa kane la ïoh ka jingkren na u Headmaster u Bah T. Passah ha ka jingïalang ba la pynïaid da ka Kong H. Shylla, Assistant Teacher bad la pynshongshit ïa ka jingïalang pynkup burom da ki jingrwai bad jingshad na ki khynnah kane ka skul.
