Shillong, Nailar 20
Ka Umphyrnai Sports Club ka la jop bad rah ïa ka nam lahduh jong ka lympung Shillong Sports Association’s U-14 Boys Football League 2023 da kaba pynliem noh ïa ka PFR Football Academy da 2-1 kol ha ka final kaba la long ha ka sngi Saitjaiñ ha madan Polo.
Haba phai sha ka jingïalehkai kaba itynnad bad ïakhaid bha, dei ka Umphyrnai kaba la ïoh ban khyrwit kol nyngkong ha ka minit ba 40 lyngba u Vikyson Wankhar. Katba ha ka minit ba 58 ka PFR lyngba u Rafieldstar Nongkynrih ka la ïoh ban pynphai ïa kane ka shi kol kaba la nang pynshongshit shuh shuh ïa ka jingïalehkai, hynrei ka kol ba la thep da u Damebantei Kharkongor ha ka minit ba 64 ka la pynlong ïa ka Umphyrnai ban pynskhem syndon ïa la ka kyrteng ban rah ïa katei ka nam lahduh.
Kum ka lahduh, ka Umphyrnai ka la khur ïa ka khusnam song pisa kaba long T.10 hajar ryngkat ka trophy bad ki medal katba ka PFR pat ka la khur T.6 hajar ryngkat ka trophy bad medal.
Kane kan dei ruh ka lympung SSA kaba ar ba ka Umphyrnai ka la jop ha une u snem, kata hadien ba ka la jop nyngkong ïa ka lympung U-10 Boys League kaba la long ha u bnai Jymmang.
Ha kane ka sngi, la ïadon lang ryngkat ki nongïalam bad dkhot ka SSA ba kynthup ruh ïa u samla Eugeneson Lyngdoh, Bah Robert Dkhar, Bah SS Rapthap, Bah Prosper Warjri nalor kiwei kiwei pat.
