Shillong, Nailar 20
Ka Jylla Sikkim ka la ïoh ban khur bun tam ki takma na ka lympung ïalehkai BFI East Zone Elite Men’s Boxing Championship, 2023 kaba la kut noh ha ka sngi Saitjaiñ ha madan Kurkalang, Ri-Bhoi District.
Haduh saw tylli ki Jylla ki la wan ban ïashimbynta ha kane ka lympung ïalehkai kaba la pynlong da ka Ri-Bhoi Boxing Association ha ryngkat ka jingïatreilang bad ka Meghalaya Boxing Association. Kine ki Jylla ki dei ka Meghalaya, Assam, Sikkim bad West Bengal.
Ka Sikkim ha kane ka lynmung ka la ïoh ban khur bun eh ki takma bud sa ka Assam kaba wan ba-ar, ka West Bengal kaba lai bad ka Meghalaya kaba wan ba saw.
Ïa ka nam kum u ‘rangïakura ba tbit tam ha kane ka lympung lane u Best Boxer la ïoh rah da u Krishna Kailas uba na ka jylla Sikkim bad ïaka nam Best Promising la ïoh rah da u Mevin Malngiang na ka jylla Meghalaya.
Ïa kane la lympung ïalehkai la pynhap pyrda da u Myntri ka tnat Sports and Youth Affairs ka Sorkar Jylla u Bah Shakliar Warjri kum u Kongsan, ha ka jingïadonlang jong u MLA ka thaiñ u Bah Damanbait Lamare lem bad kiwei kiwei.
Haba ai jingkren ha kane ka sngi na ka liang jong u Myntri u la ong ba naduh ba u la shimti ïa ka kam Myntri bad khmih ïa kane ka tnat u la angnud bha ban kyntiew ïa ki kam ïalehkai hapoh ka jylla la ka dei ha kano kano ka jait jingïalehkai khnang ba ki samla kin pynlut por kham bun ka por ha ki kam ïalehkai ban lait na ki jingsniew. Bad u la kular ruh ban ai ïa ka jingïatreilang bad baroh ki kynhun kiba ju ïaleh ban kyntiew ïa ki kam ïalehkai hapoh ka jylla.
