Shillong, Nailar 22
Ka Manchester City Football Club ka la mynjur ban soi ïa u rangïalehkai ka Belgium u Jeremy Doku na ka club Rennes ha ka jingïakut kaba kot sha ka £55.4m.
Une u rangïalehkai ba dang 21 snem ka rta, u la ïoh ban thep haduh 12 tylli ki kol na ki 92 tylli ki jingïalehkai na bynta ka Rennes ha ka lympung Ligue 1 kaba ha France.
U Doku un dei u rangïalehkai uba lai ba ka Manchester City kan soi ha kane ka ïew ïadie ïathied rangïalehkai, hadien ba ka la dep ban wanrah ïa u Mateo Kovacic na ka Chelsea ha ka dor kaba long £25m bad u Josko Gvardiol na ka RB Leipzig ha ka dor £77m.
La khmih lynti ba u Doku un sa long u rangïalehkai ba pura jong ka City ynda u la pyndep kut ki jingdonkam halor ka koit ka khiah ha Manchester.
Nalor ka Manchester City, kiwei pat ki club kiba la pynpaw ka jingthrang ban soi ïa utei u rangïalehkai ki long ka West Ham United, Tottenham Hotspurs bad ka Chelsea.
Shwa ban wan kine ki rangïalehkai, u Riyad Mahrez u la mih noh na ka City ban pynïasoh bad ka club Al-Ahli ha Saudi Pro League katba u kapten barim u Ilkay Gundogan u la leit ban pynïasoh sha ka Barcelona.
Nalor kane, ka City ka la pdiang ruh ïa ka jingtyrwa na ka club Al-Nassr na ka bynta u rangïalehkai dien ka Spain u Aymeric Laporte katba u Joao Cancelo pat u la nangjan ban leit pynïasoh sha ka Barcelona.
