Shillong, Nailar 22
Ka lympung ïalehkai phutbol ba la tip kum ka IXth Inter School Knock-Out Football Tournament ban pynlong da ka Federation of Khasi Jaiñtia and Garo People (FKJGP) Mawlai Circle, kan sdang lashai ka sngi ka 23 tarik ha Madan Heh Mini Stadium Mawlai Phudmuri ha ka por 3 baje janmiet.
Ha kane ka lympung ki la don haduh 15 tylli ki skul kiba la wan ban ïashim bynta. Ka FKJGP manla u snem ka ju pynlong ïa kane ka lympung kum shi bynta ban wanrah ïa jingkoit jingkhiah bad ban pynshlur ïa ki khynnah pule ba kin shim bynta ha ki kam ïalehkai lane kilan met ban lait na kino kino ki kam lane ki jingdih kiba sniew bad ha une u snem hi na ka liang ka seng ka la buh ruh ïa ka phang pdeng kaba ong “Em ïa u Drok, Hooid ïa ka Phutbol”.
Ha kane ka sngi plie pyrda ïa ka lympung ïaleh kai, u President ka FKJGP Sengkmie u Bah Dundee Cliff Khongsit un ïadon lang kum u kongsan bad u symbud kongsan yn long u Bah Arkinfield Khong-lam, Sports Secretary ka FKJGP Sengkmie.
Ka jingïalehkai sdang ha kane ka sngi kan long hapdeng ka OM Roy Memorial School pyrshah ïa ka Jaiaw Presbyterian School. Kumta na ka liang jong ka seng ka ïawer ïa ki riew ieit phutbol ban ïapoi lang ban sakhi ïa ka jingïalehkai bad ban ai mynsiem ïa ki khynnah ïalehkai na baroh ar tylli ki skul.
Kiwei ki skul ki ban ïashim bynta ha kane ka lympung ki kynthup ïa ka Christ Church Morning School, ka Nongkwar UP School, ka Nongkwar Presbyterian School, ka MLP School, ka Grace Care Academy, Christ Church Day, ka Mawlai Presbyterian Secondary School, ka Christian Academy School, ka Mayqueen School, ka St Denis School, ka Stephan Memorial School, ka Umrynjah School bad ka Nongkwar Secondary School.
