Shillong, Nailar 24
Ka Khadsawphra College, Mairang, ka Ri-Bhoi College, Shillong College bad ka Shillong Commerce ki la khur jingjop ha ka lympung ïalehkai phutbol ka NEHU Inter College Football (Men) Tournament 2023 kaba la long ha ka sngi Palei ha madan ïalehkai ka SAI ha NEHU.
Haba phai sha ki jingïalehkai, ha ka jingïalehkai kaba nyngkong, ka Khadsawphra College ka la lah ban pynliem noh ïa ka Shangpung College, Shangpung da 3-1 kol. Ka jingïalehkai ka la long kaba itynnad bad kaba la pynshongshit bha ïa ki nongkyrshan na baroh ar liang.
Ha kawei pat ka jingïalehkai jong kane ka lympung, ka Ri-Bhoi College ka la lah ban pynliem noh ïa ka Khrawsing Christian College, Mawngap da 3-0 kol.
Katba ka jingïakhun hapdeng ka Shillong College, Shillong pyrshah ïa ka Jaintia Eastern College, Khliehrait ruh ka la long kaba itynnad bad kaba biang bor bha hynrei ha kaba kut, ka Shillong College ka la jop ïa kane ka jingïakhun da 3-0 kol.
Ha ka jingïalehkai kaba khatduh jong kane ka sngi, ka Shillong Commerce College, Shillong ka la lah ban pynliem noh ïa ka BBS College, Shillong da 5-0 kol.
Ki jingïalehkai ki ban long pat ha ka 25 tarik mynta u bnai, kata ha ka bynta kaba-ar ne Second Round, ka St Anthony’s College, Shillong kan ïakhun pyrshah ïa ka Ri-Bhoi College, Nongpoh, ka Sohra Govt. College, Sohra kan ïakhun pyrshah ïa ka Morningstar College, Shillong bad ka Seng Khasi College kan ïakhun pyrshah ïa ka Union Christian College, Umiam.
