Shillong, Nailar 24
Wat la ïa ka Crinoline Swimming Pool kaba don ha Malki la tei da ki ‘Dohlieh’ naduh ka thma bah ba-ar jong ka pyrthei hynrei haduh mynta ka Sorkar Jylla kam pat lah satia ban shna ïa ka ‘Standard Pool’ kaba heh 50 meter. Kumta na ka liang ka sorkar jylla ka la thmu pat ban pynkylla ïa katei ka pung jngi sha ka Officer Club ne ka Resort.
Ha kaba ïadei bad kane ka jingthmu bad ïoh sngew khubor, na ka liang ki nongïalam ka Meghalaya Swimming Association (MSA) ki la pynpaw ka jingsngew bynñiaw bad jingsngewsih, da kaba pynpaw ba lada ka long ha kata ka rukom, kan long ka jingduhnong kaba khraw ïa ki riew ieit jngi bad khamtam lei ïa ki khynnah kiba ju leit ïashim bynta ha ki jingïakop bapher bapher.
“Ngim sngewtynnad satia ïa ka jingleh sorkar. Ngi la peit bad pynïaid ïa kane ka pung jngi la bun phew snem bad ha kaba bunsien ngi la ïatakhuh bad ka sorkar bad mad bun ki jingeh. Haba ngi la leit sha ki jingïalang ba la khot da ka sorkar, ngi ïohi ba ka don ka jingthmu ban pynpra biang ïa kane ka pung jngi bad ban tei da ki building kiba jrong,” la ong u President ka MSA Bah Joe Marwein haba kren sha ki lad pathai khubor ha ka sngi Palei.
“Lada ka ïaid ha kane ka rukom, kan shim por da ki 4 ne 5 snem ban pynbit pynbiang bad tei ïa ka pung jngi bad kane hi kan wanrah ka jingduhnong kaba khraw ïa ki nongjngi ka jylla jong ngi, khamtam ïa ki khynnah kiba ju hikai bad pynkhreh ïa lade haba leit shim bynta sha ki jingïakop bapher bapher,” la ong u Bah Joe bad pynkynmaw ruh ba ha u snem 2022 ki la dep ban ai jingthoh sha u Myntri ka tnat ïalehkai ban pynsangeh shwa ïa kane ka jingthmu.
“Lada ka Sorkar ka ïaid shakhmat ban pynkylla sha kiwei pat ki bynta ïa kane ka pung jngi, kum ka association ngi dawa ba ka dei ban pynshna noh da kawei ka pung jngi kaba 50 meter lym kumta ngin pyrshah beit, katba kam pat lah ban ai da kawei ka pung jngi,” u la ong.
Lah ban pynkynmaw ba na ka liang u Myntri ka tnat ïalehkai ha ka sorkar MDA-I, u la dep ban pynbna ban shna noh kaba 50 meter ha JN Stadium Complex, hynrei kane ka la shu kut noh tang ha suiñ, watla ka la pynkmen shipor ïa ki nongjngi ka jylla khamtam ïa ka association.
Bun ki khynnah ki la kiew ha ka jngi, kumta na ka liang jong ka association shen kan sa ïakynduh biang ïa ka sorkar ban ai jingthoh ban dawa sangeh ïa kata ka jingthmu katba ym pat ïoh ka pung jngi ba 50 meter, naba kane ka pung jngi kam dei tang ka jaka ai jinghikai ïa ki khynnah hynrei ka long ruh ka jaka kaba ai jingkoit jingkhiah namar ka jngi ka dei kawei na ki dawai kaba paka tam ban sumar ïa ki jingpang kiba bun ha ka met ka phad.
U Bah Michael Syiem ruh haba ïathuh ïa ka khana lyngkot halor katei ka pung jngi, ba la tei da ki ‘Dohlieh’, u la ong ba ha kane ka pung la bun kiba wan jngi bad kaba la kylla long ruh ka jaka ai jingkoit jingkhiah ne kum kata ka health club.
“50 snem naduh ba ki ‘Dohlieh’ ki la shna ïa kane ka pung jngi, kaba sngew synei pat ka long ba ka Sorkar haduh mynta kam pat don ne shna wat tang kawei ruh ka pung jngi kaba paka, katba haba phai pat sha kiwei ki jylla jong ka ri, la ïoh ban sakhi ba ki la tei bun tylli ki pung jngi,” ong u Bah Michael.
