Shillong, Nailar 24
Ka Mumbai City FC, ka la shah pynngat ha ka Group-D jong ka lympung AFC Champions League 2023-24, ha ryngkat bad ka Al-Hilal SFC, kaba don ïa u Neymar kum u rangïalehkai ba paw ka pyrthei.
Lah ban kdew ba ka Al-Hilal na Saudi Arabia ka la shah rem noh ha ka final jong ka AFC Champions League ha ka aiom ba la lah ha ka jingïakhun pyrshah ïa ka Urawa Red Diamonds ka club na Japan hynrei mynta ka la nang pynkhlaiñ ïa la ka kynhun da kaba wanrah ïa u khlur ïalehkai ka Brazil u Neymar na ka Paris Saint-Germain (PSG).
Ka Al-Hilal, kaba la rah haduh saw sien ïa ka nam lahduh jong ka AFC Champions League, ka la dep ban soi ruh ïa u rangïalehkai pdeng ka Serbia u Nemanja Matic, u Sergej Milinkovic-Savic jong ka Napoli bad ruh Ruben Neves jong ka Wolverhampton Wanderers.
Nalor ka Mumbai City bad ka Al-Hilal, ki ar tylli kiwei pat ki club ba la ngat ha ka Group-D ki long ka FC Nassaji Mazandaran kaba na Iran bad ka Navbahor kaba na Uzbekistan.
Ka jingpynkhalai nusip ïa ki club na ka bynta ka lympung 2023-24 AFC Champions League ka la long ha ka sngi Palei ha AFC House ha Kuala Lumpur, Malaysia.
Ha kane ka lympung ki don haduh 40 tylli ki club ïa kiba la phiah ha ki 10 tylli ki Group, ha kaba ha kawei ka group la buh saw tylli ki club.
Ïa kine ki 10 tylli ki group pat la phiah ha ki ar tylli ki Zone, kata 5 tylli ki group ha ka West Zone (ba kynthup na ka groups A haduh E) bad san tylli ki group ha ka East Zone (groups F haduh J).
Ka jingïakhun jong ka group jong kane ka lympung kan sdang naduh ka 18 tarik u Nailar. Kawei kawei ka club kan ïakhun arsien pyrshah ïa kawei ka club.
Ka Mumbai City FC, kaba la rah ïa ka nam lahduh jong ka Indian Super League ha une u snem, kan dei ka sien ba ar ba kan ïakhun ha ka lympung AFC Champions League. Baroh ki jingïalehkai ha la ïing jong ka Mumbai City FC kin long hapoh ka Shree Shiv Chhatrapati Sports Complex ha Balewadi, Pune.
