Shillong, Nailar 27
Ka Mohun Bagan Super Giant ka la ïoh ban rung sha ka jingïakhun semi-final jong ka lympung Durand Cup 2023 hadien ba ka lah ban pynliem noh ïa ka Mumbai City Football Club ha ka jingïalehkai kaba la long ha ka Sngi U Blei.
Haba phai pat sha ka jingïalehkai, ka Mohun Bagan ka la lah ban pynliem noh ïa ka Mumbai City FC da 3-1 kol. Ïa ki kol jong ka Mohun Bagan la ïoh ban thep da u Jason Cummings, Manvir Singh bad u Anwar Ali. Katba ïa ka shi kol jong ka Mumbai pat la ïoh ban thep da u Pereyra Diaz.
Kine ar tylli ki kynhun ki dei ruh kiba khlaiñ bor bad radbah hapoh ka Ri bad ha kaba baroh ki khmih lynti ba ki long ki ar tylli ki kynhun ban ïakhun ïaknieh ïa ka nam lahduh jong ka lympung Indian Super League, bad kumta kane ka jingïakhun ha ka Durand Cup ruh ka la long shisha kaba itynnad bad kaba ïakhaid bha, ha kaba baroh ar liang mamla ki la ïakhun dohiap bad wad ki lad ki kabu ban pynkhih jar.
Hadien kane ka jingjop, mynta ka Bagan kan pynkhreh pat ban ïakhun pyrshah ïa ka Football Club Goa ha ka semi-final jong katei ka lympung, hynrei na ka liang jong u coach u Juan Ferrando u la pynpaw ka jinghun ha kaba ïadei bad ka rukom ïalehkai khamtam lei hadien ba ki la mad ka nam rem ha ka jingïakhun pyrshah ïa ka East Bengal Football Club ha ka group stage.
