Shillong, Nailar 27
Ki ar tylli ki kol ba la ïoh ban khyrwit da u Kylian Mbappe ka la lah ban ïarap ïa ka Paris St-Germain (PSG) ban pynliem noh ïa ka Lens bad khur ïa ka jingjop kaba nyngkong ha ka lympung Ligue 1 jong kane ka aiom kaba thymmai.
Haba mih madan ha ka sien kaba nyngkong jong kane ka aiom, hadien ba ka la don ka jingbym shai halor ka lawei jong u hapoh ka club, une u rangïalehkai shakhmat ka France u la ïoh ban khyrwit kol tang ha ka jingpyrshang kaba nyngkong bad ïa ka kol kaba ar kham hadien.
Ha kane ka jingïaleh-kai ha shwa ban wai ka kylla step, u Marco Asensio u la lah ban pyntam da shi kol ïa ka PSG.
Haba bteng ka jingïa-lehkai ha ka kylla miet, dei ha ka minit kaba 52 ba u Mbappe u la ïoh ban thep ïa ka shi kol bad dei tad ha ka minit kaba 90 ba u la ïoh ban thep sa ïa ka kol kaba ar, hynrei shwa ban put pynwai ïa ka jingïalehkai na ka liang jong ka Lens ka la ïoh ban pynphai shi kol lyngba u Morgan Guilavogui.
Lah ban pynkynmaw ba ha kane ka aiom ïalehkai kaba thymmai, ka PSG ka la mad ïa ka jingïakhaid ha baroh ar tylli ki jingïalehkai bad kane ka jingjop, ka la lah ban kyntiew mynta ïa ka sha ka kyrdan kaba saw, ha kaba ka la khur 5 point.
