Shillong, Nailar 27
U Bah Phelenstar Rani bad Bah RA Rangslang, kiba long u President bad General Secretary ka Tyrsad Area Sports Association (TASA) ki la kitbok kitrwiang ïa ka khynnah ïalehkai phutbol ka Wanrihun Kharnaior, kaba ïalekai kum ka ‘striker’, kaba la shah jied na ka bynta ban ïadon bynta bad ka kynhun ki ‘thei ïalehkai phutbol jong ka Meghalaya ban aireng ha ka lympung ïalehkai ka Sub Junior National Football Championship ka ban long ha Punjab.
Ka Wanrihun ka dei ka khynnah kaba la saiñ dur ïa ka ha ka shlem ai jinghikai ba kyrpang ki khynnah rit ba la tip ïa ka kum ka Grassroot Center, kaba dei kawei na ki shlem ai jinghikai ba kyrshan lyngba ka tnat Sports jong ka TASA bad ka dei ka khynnah kaba pule ïa ka Class VII ha Tyrsad Higher Secondary School.
Ha kane ka shlem ai jinghikai ba don ruh bad arngut ki coach ki don ym duna ïa ka 80 ngut ki khynnah ba kynthup shynrang bad kynthei bad kane ka long ka burom kaba khraw ïa kane ka shlem ba kan sei ïa ka khynnah ïalehkai kum ka Wanrihun ban ïoh ïa ka kabu ban mihkhmat ïa ka jylla.
